Home Local SNAF a inaugura su fundacion dia 20 di November ultimo cu un...

SNAF a inaugura su fundacion dia 20 di November ultimo cu un acto simbolico y un lectura interesante  

SHARE

 

Diamars 20 di november 2018 Space and Nature Aruba Foundation (SNAF) a inaugura oficialmente su fundacion cu un acto simbolico y presentacion di un lectura hopi interesante na Universidad di Aruba.

E anochi aki nos fundacion tabatin e honor di por a conta cu presencia di Gobernador di Aruba, Su Excelencia Señor Alfonso Boekhoudt. Su Excelencia a primi un boton y asina a duna inicio na un video traha dor di SNAF y cu e acto simbolico aki a inaugura nos fundacion. Tambe nos Minister di Educacion, Ciencia y Desaroyo Sostenibel, dr Armando Lampe a duna acto di presencia.

Despues di e acto simbolico presidente di Space and Nature Aruba Foundation a tene un charla den cual e a relata con e idea di e fundacion a nace. E a indica cu for di edad hoben algun di nan ya caba tabata forma parti di un science club y a sigui cu e hobby aki y na caminda a bin topa cu otronan cu tambe tabata hopi interesa. E idea a crece pa pone tur e conocimento y experiencia na bienestar di nos comunidad, tanto pa esnan grandi como chikito. E hobby a hiba nos na cumpra nos mes telescopianan y nos tin algun aña caba ta pone hopi tempo den organisa actividadnan pa observa strea y planetanan y  tambe haci caminata den naturalesa. Nos ta duna tambe workshop y organisa lectura manera esun cu a wordo presenta mas despues e anochi aki dor di Profesor Faber.

Nos directiva ta consisti di personanan cu ta traha den diferente ramo di trabou y cada un ta contribui den un forma unico na nos fundacion. Siguientemente e presidente a presenta e miembronan di e directiva na esnan presente. Señor Jairo Vrolijk ta e vice presidente y den bida diario ta un ingeniero electrico. Den nos fundacion e ta e specialista di astrofotografia.

Señor Darryl Everon ta e secretario. Darryl ta un ‘system engineer’ y e ta e tecnico di telescoop.

Señora Silveika Maduro-Willems ta e tesorero. Silveika ta un maestra cu ta duna les di e idoma hulandes.

Señora Aischell Hidalgo ta e segundo tesorero. Aischell ta un ‘assistant auditor’.

E dos damanan aki ta e motornan tras di nos actividadnan.

Señor Lisandro Arends ta un miembro di directiva y den bida diario ta un ‘weather observer’, cu ta e consehero di tempo y cu ta specialisa den ‘Earth Science’.

Señor Francisco Croes ta un miembro di directiva y e consehero general. Francisco ta un maestro di fisica cu ta un pensionado.

Y e presidente señor Jeremio Maduro, ta un maestro di ciencia y ta percura pa desaroya material educativo.  Nos fundacion ta sinti nos masha privilegia cu Professor Sandra Faber a duna e prome lectura oficial riba e dia aki cu a inaugura e fundacion.

Despues a hiba palabra e decano di e ‘Faculty of Arts & Science’ señor Tim Croes cu a representa e rector di Universidad di Aruba. Señor Croes a duna di conoce den su charla cu Universidad ta hopi contento di por host e actividad aki conhuntamente cu nan ‘Center of Lifelong Learning’ y Space and Nature Aruba Foundation pa asina forma un plataforma. Den bida diario e ta un maestro di matematica y e a haci un comparacion. E studiantenan ta cuminsa haña les den figuranan basico den tres dimension y despues den formula y tambe ta siña integra y calcula den tres dimension. Pa e anochi special aki e la indica cu tur presente lo biaha den dimensionnan di mas halto den e universo y esaki lo añadi un dimension nobo den bida di cada un presente.

Por ultimo Profesor Sandra Faber, como invitado special y  cu tin un curriculo impresionante, a duna un lectura titula: ‘Astro-imaging: e pasado, e presente y e futuro’.

Durante su lectura Profesor Faber a splica tocante e pasado di ‘astro-imaging’, con e ta na e momentonan aki y kico e expectativa pa futuro ta. Actualmente profesor Faber ta un profesor di Universidad di California y ta miembro di Lick Observatory. Faber ta un astronomo cu ta haci observacion visual y ta haci investigacion den cosmologia y formacion di galaxianan. Un di e logronan di profesor Faber ta: e formula pa calcula e grandura di galaxianan cu ta yama ‘the Faber-Jackson Law’.
Faber ta un di e tres astronomonan cu a diagnostica e fayo di e Hubble Space Telescope y a forma parti tambe di su reparacion.  Ademas e la diseña e ‘Keck Observatory’ cual diseño a inspira otro paisnan pa traha observatorionan gigantesco. Faber ta co-autor di mas cu 350 tesis cientifico y di cual tesisnan a wordo cita mas di 54000 biaha. E a ricibi diferente premionan pa su trabounan di diferente institucion cientifico y na 2013 e a ricibi e ‘National Medal of Science’ for di Presidente di Estados Unidos, Barack Obama.

SNAF ta gradici esnan cu a acompaña nan durante e anochi special aki pa nan presencia y na mes momento kier a gradici Universidad di Aruba y ‘Center For Lifelong Learning’ pa nan disponibilidad y uso di aula.

Corda like y follow nos Facebook page ‘space and nature aruba foundation’ y nos website ’spacenaturearuba.com pa mas informacion di nos future eventonan.

Potret cortesia di: JeanCarlos Maduro y Francisco Croes, miembro di SNAF

Di robes pa drechi: Su Excelencia Minister di Educacion, Ciencia y Desaroyo Sostenibel, Dr Armando Lampe, señor Lisandro Arends, señor Darryl Everon, señor Jeremio Maduro, Professor Emeritus Sandra Faber, Su Excelencia Governador di Aruba, señor Alfonso Boekhoudt, señora Silveika Maduro-Willems, Señora Aischell Hidalgo, señor Jairo Vrolijk y señor Francisco Croes.