E Atleta di Volleyball Nakisha Winklaar, hunto cu su Mayornan, despues di a dedica un periodo largo di preparación pa por a continua su estudio na Estados Unidos, ta weita un di su soñonan wordo realisa esta pa sigi studia y forma parti di un Team Internacional di Volleyball.
Aruba Volleyball Association ta sumamente contento cu e noticia aki cu e Atleta Nakisha Winklaar a ricibi un Scholarship na USA pa continua no solamente cu su estudio pero tambe pa sigi desaroya y profesionalisa su mes den su deporte di volleyball.
Den e mundo di volleyball aki na Aruba, Nakisha Winklaar ta conoci como e Atleta cu e dedenan mágico . Na un edad hoben Nakisha Winklaar a cuminsa practica e deporte di volleyball y ya for di comienzo di su trainingnan Nakisha tawata resalta como un Setter di Volleyball. Den mundo deportivo y muy especial den e deporte di volleyball, un Setter tin un rol masha importante y Nakisha Winklaar a nace cu e Don di ta un colocadora/armado den e wega di volleyball. Nakisha a resalta na Weganan Escolar di Volleyball, na Olimpiada Escolar, cu Selección di Scol unda Nakisha a participa na e Weganan di Volleyball Interinsular y hopi jong ela cuminsa train volleyball organisa cu e Team di Savaneta La Fama y ultimo añanan ela hunga cu e Team di Damas di POVA.
E Atleta Nakisha a forma parti di e Selección di Teamnan Escolar y tambe di e Selección pa Weganan di Reino. Y na aña 2016 Nakisha Winklaar a forma parti di e Selección Nacional di Volleyball di Aruba cu a competi na e “CAZOVA World Championship Qualification Tournament” cu a tuma lugar na Aruba. Y e aña aki na 2018 Nakisha a forma parti di e Selección Femenino di U-23 di Aruba como e Capitan di e Selección Nacional y como e Setter principal.
Na diferente ocasión, tanto local como den Torneonan Internacional di Volleyball Nakisha Winklaar tawata sobresali como Setter den e Team/Selección. Entrenadornan Internacional di NORCECA cu tawata bini Aruba den cuadro di e desaroyo di volleyball aki na Aruba, semper tawata laga atrás un nota di interés y prospecto pa e Atleta Nakisha den kende nan tawata visiona un Atleta cu por yega leeu como Setter den volleyball.
Y asina a sosode tambe cu na momento cu Nakisha Winklaar a obtene e oportunidad na BROWARD COLLEGE na Miami, unda ela ricibi un scholarship pa e por continua cu su estudio y alabes forma parti di e Selección di Volleyball di dicho Colegio.
No por keda sin expresa palabranan di gratitud pa Sr. Irald Phelipa y Sr. Trevor Therolde kendenan ta e dos personanan cu a dedica, apoya y yuda e Atleta Nakisha Winklaar realisa un di su soñonan.
Directiva di Aruba Volleyball Association ta felicita e Atleta Nakisha Winklaar, su Mayornnan y henter famia cu e logro significante aki y ta desea Nakisha hopi éxito cu su estudio y su carera como Hungado Internacional di Volleyball.
Nakisha Masha Masha Pabien y Hopi Éxito ¡