Parlamentario Endy Croes ta splica cu fin di november e overbruggingstoelage di Mike Eman a caba y ta tempo pa e cuminsa traha awor. Mike Eman a cobra salario di minister pa un aña largo. Mike Eman a opta pa no drenta Parlamento di Aruba traicionando asina mas di 7000 votador cu a deposita nan confianza den su persona cu e speransa cu nan lo haya un representante digno den Parlamento. Pero atrobe arogancia y sed pa poder a domina den e venanan di Mike Eman unda el a scoge pa no drenta Parlamento y caminda e mester ta pa haci su trabao. Mike Eman a prefera di haci uso di e ley cu ta permitie cobra 12 luna su salario di minister y keda asina sin traha y drumi den su penthouse den Marisol Building. Mientras tanto 12 luna a pasa y overbruggingstoelage tambe a caba. Ban wak con Mike Eman lo haci cu su bida di luho awor. Parlamentario Croes ta sigui splica cu e manera di biba di Mike Eman ta bisa bo hopi. Na tres ocasion Mike Eman a manda EMCO failliet. Tambe ta conoci cu tras di maneho di Mike Eman, ATV tambe a bati bancarota y tin añanan cu no a paga ni huur. Pues na mesun manera aki Mike Eman a maneha Aruba. Nos por corda su disertacion den Parlamento momento cu el a bisa cu no tin otro manera y Aruba lo sigui bay djis un tiki mas den rood. Tambe su otro expresion cu e ta orguyoso di e debe y e debe t’ey pa nos tur bay pag’e den futuro. Aki Mike a referi na e debe nacional cu el a redobla. For di 41.7% na 2008 pa 90 % na 2017. Pues di cada florin cu drenta caha di gobierno 90 cen ta bay na paga debenan di Mike Eman y AVP. Pueblo, bo ta haya esaki husto? Esaki a conduci cu interes tambe a mas cu redobla y Pueblo di Aruba mester a paga 219 MIYON florin solamente na interes riba placanan presta di Mike Eman y AVP cual ta igual na mas di 600 mil florin pa cada dia, 365 dia pa aña. Pues e mesun manera cu Mike Eman a maneha EMCO y ATV mandando tur dos failliet Mike Eman a maneha pais Aruba. Tristo pero esaki ta e puro berdad! Enbes di drenta Parlamento a opta pa sigui cobra un aña largo sin traha y usa su tempo liber pa pasa baba hende na entiero. Diripiente dialuna ultimo a yama su activistanan unda 50 hende a acudi pa malinforma pueblo riba e reforma fiscal y e reparticion husto. Su mal maña di manipulacion a keda igual pero pueblo tin’e door y no ta kere den Mike Eman mas. Mike Eman ta sinonimo na HANANAIS, e profeta di mentira di Babilonia di acuerdo cu scritura. Parlamentario Croes ta termina splicando pueblo cu nan ta trahando dia y nochi pa trece e alivio real y e reforma fiscal den un reparticion husto ta un di e prome pasonan cual ya caba na fin di januari 2019 pueblo lo bay nota cu e lo keda cu mas placa den su cartera. Croes ta finalisa bisando cu ora bo topa Mike Eman, puntr’e libremente ‘Mike, pakico bo a desgracia nos pida baranca di e forma aki?’ Ohala cu nunca pero nunca mas Mike of AVP bolbe na poder.