Diabierna ultimo a tuma luga un reunion publico di parlamento caminda a trata presupuesto di tres Hoge Colleges cu ta entre otro di Raad van Advies, esun di Algmene Rekenkamer y esun di Parlamento, miembro di fraccion di AVP, Mervin Wyatt Ras a declara.
Tur tres presupuesto pa 2019 a wordo aproba unanimamente y e parlamentario a mustra cu esaki ta e forma di atende tambe cu ‘Hoge Colleges.’
“Den pasada tabata asina cu hopi miembro di Parlamento tabata haci uzo di e ocasion aki pa haci weganan politico ora cu ta trata e diferente organonan halto di nos pais.
E tempo ey mi persona den calidad di Presidente di Parlamento, tabata haya e forma ey algo mahos pa anda cu e diferente entidadnan aki, sinembargo e tabata wordo haci y awor nos di fraccion di AVP a mustra cu nos lo no haci e tipo di cosnan aki cu otro fraccionnan a haci den pasado durante di e tipo di reunionnan aki.
Fraccion di AVP a sostene tur e diferente presupuesto di e organonan halto aki den forma unanime pa asina e organonan aki por sigui haci nan trabou.
Mi ta kere cu nos mester duna tambe aprecio y elogio na e organonan aki pa asina nan por sigui funciona y duna sosten na e trabou y funcionamento di Parlamento.
Sinembargo apesar cu nos a sostene y aproba e presupuesto di Parlamento, caminda nos fraccion tambe ta traha na dje, mi tin cu señala si cu e forma cu tin cu atende cu parlamento dor di Presidente di Parlamento, mi no ta haya su forma esun adecuado pa e motibo cu e ta wordo guia dor di gobierno.
Tur reunionnan cu ta wordo yama di Parlamento, ta wordo yama di un ora pa otro manera por ehempel nos ta wordo yama pa un reunion di comision central recientemente, den un par di ora.
Den un tempo di dos ora nos ta haya un oproeping digital pa nos bin parlamento y esey no ta e forma di procede.
Antes tabata asina cu e hasta e invitacion pa e reunionnan tabata wordo entrega na cas y tabata tene na consideracion cu esaki ta tuma luga entre dos pa cuater dia prome cu e reunion tuma luga pa asina duna tempo na e parlamentarionan pa asina e reunion por tuma luga cu tur trankilidad.
Awor ta mustra cu ta pensa cu tur cos por bay digital ta creando un mal custumber pero esaki no. tin mag di sosode y ademas nos ta haya un ley di presupuesto cu awor aki e presupuesto supletorio 2018 caminda nos a haya dos dia pa entrega preguntanan relaciona cu esaki.
Mesun caso cu e reunion pa atende cu e fondo di plan di crisis social cu nos a haya y mester a entrega preguntanan mesora y mi ta kere cu Presidente di Parlamento mester bay realisa cu e ta traha pa Parlamento y no cu e tin cu haci loke gobierno ta mande pa haci.
Pa tal motibo mi ta kere cu e forma y sistema aki ta uno dictatorial cu ta wordo imponi riba nos y mi ta spera cu pa e aña cu ta bin, nos keda cla cu hopi punto cu nos ta bezig cu nan.
Na e momentonan aki por ehempel nos ta bezig cu e situacion caminda trahadonan ta wordo kita y nos no sa di nada caminda nan ta bay otro caminda pa motibo cu nan no ta haya sosten di parlamento y mi ta kere cu e tipo di asuntonan aki ta cosnan cu nos tin cu wordo informa debidamente riba loke ta pasando cu e trahadonan aki.
Mi ta kere tambe cu nos opinion mester wordo tuma na serio y por ehempel si nos pidi un reunion pa nos haci preguntanan na gobierno y caminda nos no ta haya contesta, e Presidente di Parlamento mester tambe a diligente cu e diferente ministernan pa nan contesta nos preguntanan.
Tur esakinan e Presidente tin cu haci y mi ta kere e mester bay refleha pasobra hopi biaha e ta bisa cu nos estado di derecho, cual expresion su persona ta usa hopi y awor cu e ta na e posicion ey, pa e salvaguardia nos estado di derecho pasobra Parlamento tin un rol importante den proceso di control di gobierno caminda nos tin cu keda haci nos trabou y nos haya oportunidad tambe pa nos por haci nos trabao di e miho forma posibel,” Parlamentario Mervin Wyatt Ras a declara.