CU E MANEHO NOBO NOS LO REINFORSA NOS COMPROMISO NA E SDGS Y LOGRA E METANAN PA 2030
Na La Cabana Ballroom a tuma luga un evento importante pa cuminsa e proceso pa diseña e Plan Strategico Nacional, NSP. Na e ocacion aki, Prome Minister Evelyn Wever-Croes a hiba palabra splicando e vision amplio di Gabinete Wever-Croes riba e tereno aki. Na e encuentro aki tawata presente stakeholders di Gobierno di Aruba, Parlamentarionan, Ministernan, sector priva, NGOs, y representantenan di nos institutonan academico.
Prome Minister a enfatisa e importancia pa Gobierno di Aruba inclui tur e gruponan menciona den e diseño di Plan Strategico Nacional. E encuentro aki sin duda a brinda un dia productivo, unda ideanan nobo a wordo treci dilanti.
E Primier di Aruna a duna un resumen di su participacion ulimo na e Asamblea General di Nacionnan Uni november ultimo.
“3 aña pasa, e Asamblea General a stipula un agenda 2030 pa transforma nos mundo. Esaki despues cu a realisa cu progreso den un pais mester bay man den man cu bienestar di e ciudadano. Aki na Aruba tambe, nos Gobierno a pone e ser humano central y den esaki e SDG ta core manera un linea cora den nos programa. E meta final: inclusion, caminda ningun hende ta wordo laga atras.
Pa sigura exito di e SDGs pa Aruba, nos mester di sinergia den nos maneho. Manera mayoria di boso sa, SDGs ta interconecta e dimensionnan economico, social, y medioambiental pa por acelera e metanan di Nacionnan Uni pa 2030. E sinergia entre sector publico, sector priva, NGOs, y academia ta hunga un rol esencial, especialmente considerando e retonan cu nos ta enfrenta como un pais cu ta formando parti di loke Nacionnan Uni ta considera SIDS, Small Island Develping States. Nos no por crea maneho mas basa riba procedura di pasado. Nos mester tuma un maneho mas comprensivo y mas coherente ora nos ta traha maneho nobo pa logra e metanan cu nos ta pone pa 2030.
Durante bishita di e representantenan di UNDP algun siman atras, nos por a ripara con hopi esfuerso y cuanto actornan ta hunga un rol den e planeacion y implementacion di SDGs. Apart di Jamaica, Aruba ta un di e islanan mas avansa den e proceso di implementacion di SDGs den nos region. Awo cu e formacion di e National Strategic Plan aki nos lo reinforsa nos compromiso na e SDGs. Y asina aki crea un futuro unda niun hende no lo wordo laga atras. Un futuro unda cu nos yiunan, nietonan, bisanietonan lo ta orguyoso di dje”.
Prome Minister a conclui dunando danki special na e team di Directie Economische Zaken pa e invitacion y pa organisa un evento exitoso asina. Un palabra di gradicimento tambe a bay na e Comision di SDG Aruba cu ta e pioneronan den region pa cu e implementacion di e SDGs na Aruba. Tambe Prome Minister a gradici tur e gruponan di trabou cu ta brinda nan aporte na e planeamento y implementacion di SDGs incluyendo e Indicator Working Group, Expert Working Groups, y Awareness Working Group. Finalmente e mandatario principal di nos pais a gradici na cada presente kendenan a duna nan tempo y pa comparti nan concemento den nan area di expertisio.
“Nos ta aprecia esaki masha hopi mes, y boso contribucion valioso lo forma parti di e Plan Strategico Nacional. Di e momento aki boso tur ta forma parti di historia. Aruba lo por ta conoci como mucho mas cu solamente santo blanco y un clima perfecto. Aruba lo por sirbi como un ehempel pa otro islanan no solamente den region pero pa tur islanan rond mundo di con pa yega na un desaroyo duradero cu e ser hemano central. Hunto nos por enfrenta cualkier reto cu bin nos dilanti. Y asina forma un pais mas fuerte cu nunca”, tawata e palabranan cu Prome Minister Evelyn Wever-Croes a expresa na final di su discurso na e encuentro di NSP.