Cu participación di diferente institución y personanan di sector priva, sector publico, NGO’s y tambe gruponan civil di nos sociedad
ORANJESTAD – Ministro di Finansa, Asuntonan Economico y Cultura, Sra. mr. Xiomara Ruiz-Maduro a haci apertura di e prome evento pa e Plan Nacional Strategico 2019-2022 (NSP 2019-2022).
Na 2017 gobierno di Aruba, igual cu hopi otro país, a dicidi di compromete cu e Agenda 2030 di Nacionan Uni pa implementa e 17 metanan mundial di desaroyo sostenibel (SDG’s). E prome paso tabata pa instituí e SDG comisión pa guía e proceso di SDGs na Aruba. Siguientemente na 2017 cu asistencia di UNDP y ECLAC y den conversacionan cu stakeholders local a propone un Roadmap pa e implementacion di e SDGs na Aruba. E Roadmap ta refleha 9 Acelerador den e 5 Pilarnan cu ta People, Planet, Prosperity, Peace y Partnership. E Roadmap a wordo aproba door di conseho di ministro na augustus 2018 y cu e aprobación aki a duna inicio na e trabaonan pa formula den participación cu diferente institucionan e Plan Strategico Nacional.
E 9 Aceleradornan ta representa areanan di maneho necesario pa por realisa e SDGs. A forma 3 grupo di trabao di expertonan, cu tin e nomber Expert Working Groups, EXWGs. Tin un EXWG pa e aceleradornan di People, un pa Planet y un pa Prosperity. E 3 grupo di EXWGnan ta intersectoral y multi disciplinario y nan a inicia e conversacionan pa crea e Plan Nacional Strategico (NSP) pa e periodo 2019-2022. Cu e plan aki ta busca pa sincronisa e maneho di e diferente sectornan y ministerionan den un forma coherente y coordina teniendo na cuenta e dimensionan económico, social y di medio ambiente.
Departamento di Asunto Economico ta coordina e proceso di planificación dunando asistencia na e EXWGs y ta guía y adapta e metodologia den un proceso participativo. No ta prome biaha cu na Aruba ta traha un Plan Nacional den forma participativo. Na 2008-2009 a traha riba e Plan NOS ARUBA 2025. E diferencia awor ta cu internacionalmente Nacionan Uni a defini 17 meta pa desaroyo sostenible (SDGs) cual ta wordo usa pa defini e metanan pa Aruba. Esaki ta parti di e trabao di e gruponan di experto EXWGs.
E evento di dialuna dia 3 di december a reuni diferente institución y personanan di sector priva, sector publico, NGO’s y tambe gruponan civil di nos sociedad pa cu nan participación duna forma na e NSP 2019-2022, Nos Plan, Nos Futuro.
Minister di Enseñansa, Ciencia y Dessaroyo Sostenibel, Sr. Dr. Armando Lampe, tambe a hiba palabra durante e evento y Minister Presidente Sra. mr. Evelina Wever-Croes a clausura e evento afirmando e importancia pa tin un Plan Strategico Nacional pa Aruba y gradiciendo e participación di tur presente y alaves elogia e energía hopi positivo cu a caracteriza e evento di inicio te fin.