Fundashon Nos Kier Boneiru Bek ta organisa su terser konferensia riba Derecho di Outodeterminashon I e Futuro Politiko di islanan di Antias I Karibe e fin di siman aki. Ta programma pa partisipa oradornan, lidernan I ekspertonan for di St Eustatius, St Maarten, Korsou, Aruba, Puerto Rico, San Andres, Grenada I US Virgin Islands. Komo key-note speaker lo ta eksperto riba gobernashon I outodeterminashon di Nashonan Uni Dr. Carlyle Corbin. E situashon politiko I estatal di Bonaire I St Eustatius a desaroya I ta di indole ku nos no tin ni poder ni nos destino mas den nos mes man. Awor ta momento pa rekonsiliashon I reunifikashon komo islanan ruman Antiano. I ku e sosten I solaridat di nos otro rumanan Karibense luchando huntu nos lo por logra. Nos tin derecho di ta bas bek den nos mes kas, liber I igual, I ku nos propio gobernashon. Ora Bonaire wordu re-inskribi bek riba e lista, Hulanda tin e obligashon di raporta kada anja na e Asamblea General di Nashonan Uni di e forma ku e ta asisti I sostene nos realisa nos propio gobernashon bek I realisa e progreso I bienestar sosial, ekonomiko, politiko I edukativo di e pueblo Boneriano, konforme artikulo 73 di Deklarashon di Teritorionan-Sin- Propio-Gobernashon di Nashonan Uni.
Diabiernes 7 december den Parke Wilhelmina di 6:00pm pa 9:00pm lo tin un Meet & Greet ku e partisipantenan I delegashonan di diferente islanan partisipando I tambe un RadioTon pa rekauda fondo pa paga pa e investigashon di grupo eksperto pa Nashonan Uni pa e proseso pa reinskribi Bonaire bek riba lista di Nashonan Uni.
Diasabra 8 december den Parke Wilhelmina di 6:30pm pa 9:00pm lo tin un symposio na aire-liber ku presentashonan di lidernan I ekspertonan di tur e islanan partispante I entrada ta liber pa publiko.
Konsidera esaki komo un invitashon personal pa presensia I aporta na e lucha pa un miho Bonaire pa nos yunan I nan futuro generashonan.
Pa mas informashon tuma kontakto via email: [email protected] o via cellelar/whatsapp 782 5664 o 786 4576
James Finies, presidente Nos Kier Boneiru Bek