Siman pasa a sorprende Marisela Boekhoudt, medisch codeur na departamento di Medische Administratie na Hospital cu e reconocemento special di a bira empleado di luna di november 2018.
Marisela ta e prome cu ta un CHIMA codeur certifica na HOH. E rekisitonan pa logra e certificacion aki no ta facil pero Marisela a logra esaki door di su dedicacion y profesionalismo. Ela zorg pa logra e ‘opleiding’ aki door di studia tambe den su oranan liber asina demostrando cu e tin un interes grandi pa su trabou y tambe pa sigui crece y mehora su mes. Tambe e ta sigui cursonan online pa tene su mes up to date. Arnold Solognier, Manager di Medische Administratie, a duna di conoce cu esaki ta un di e puntonan cu a sobresali y a pone cu a dicidi pa nomina Marisela pa empleado di luna. Ademas e ta hopi servicial cu clientenan y e ta hopi bon cu coleganan. E samenwerking, yuda coleganan cu trabou y duna splicacion dicon ta haci cosnan cierto manera ta forma e caracter di e empleada specifico aki. E ta un persona hopi esencial p’e departamento.
Stefan Lucas, Information Manager, a duna di conoce cu e departamento aki ta warda tur dossier y ta pone code riba nan. Esey ta loke Marisela Boekhoudt ta haci y desde 2013 a bin cu un forma y sistema nobo Canades di coding pa traha den e departamento. E ta e persona cu sa e miho forma di e codenan y a tuma cursonan. El a traha duro den su tempo liber pa logra haya su certificado.
E ta un persona serio pa cu su trabou y ta coopera semper cu su coleganan y ta yuda nan diariamente cu cualkier pregunta tocante coding. Ta importante pa hospital tin tur cos cu un code pa ora di tuma decision, pero tambe pa sa kico ta pasando den hospital. Marisela Boekhoudt tin un trabou cu ta hopi importante.
Marisela ta un colega ehemplar cu ta demostra di tin un ambicion grandi pa su trabou, ta dedica y ta demonstra iniciativa necesario pa yuda mehora su departamento.
Hunta di Directiva di Dr. Horacio E. Oduber Hospital ta masha contento cu e escogencia aki y ta desea Marisela hopi mas exito den su trabou diario. Sigui asina!