Diaranson 28 november mainta na Plaza Speransa na San Nicolas, un aña despues di e tragedia cu a kita bida di dos angelito, Gobierno di Aruba, den presencia di miembronan di famia di e dos angelitonan Rishandroh y Roshandrick Eugene y demas invitadonan, a planta un mata di Wayaca den memoria di e dos angelitonan aki expresando asina e tristesa amargo cu e tragedia di nan morto a laga atras como tambe pa permiti e memoria di e dos angelitonan special aki biba pa semper den curason di nos pueblo.
Cu plantamento di e mata aki, nos ta confirma nos compromiso pa continua nos lucha pa proteha tur mucha! Nos meta final ta pa cada mucha haya amor y cariño, pa caba cu abuso y pa yega na castigo mas halto pa abusadornan.
Den maneho di gobernacion di Gabinete Wever-Croes, muchanan tin prioridad hopi grandi. Gabinete Wever-Croes a tuma desicionnan y accion pa percura cu nos muchanan ta protegi. Gobierno a bin cu un Crisis Plan Social cu nos ta ehecutando y ya poco poco resultadonan positivo di e plan aki ta birando visibel.
Maneho di Gabinete Wever-Croes ta entre otro:
- Aumenta castigo di abusadornan di mucha;
- Institui un meldcode obligatorio pa tur profesional cu tin sospecho riba abuso sexual di mucha. Actualmente nos profesionalnan riba e tereno aki ainda nan ta actua segun secresia di nan profesion y no por raporta e abusonan aki;
- A institui un sistema pa atende e ‘meldingen’ imediatamente. Actualmente, tin ‘melding’ cu ta warda 4 siman pa wordo atende;
- Bin cu mas dokter di confiansa (vertrouwensarts) 24/7 pa test muchanan riba abuso sexual. ‘Rape tests”. Awor tin un forensico so cu ta cualifica y e no por tey 24/7. Di e manera aki e pruebanan por drenta mas lihe y esaki por conduci na castigonan mas halto;
- A ekipa departamento di Jeugd en Zeden politie miho pa investiga e casonan aki mas lihe y eficientemente. Mas lihe e caso yega Corte y mas miho e ta prepara, mas halto e castigonan ta bay bira.
- Pa e Crisis Plan Social Gobierno a pone 18 miyon florin disponibel.
Prome Minister Evelyn Wever-Croes: “Abuso di mucha ta causa hopi indignacion y rabia den nos tur. P’esey ta hopi importante pa nos tur sa kico nos como un comunidad mester haci pa algo asina no bolbe ripiti. Comunidad completo ta protectornan di nos muchanan. Hunto nos ta protege nos muchanan di malechornan. Cu e plantamento di e mata den memoria di dos angelito, ta un simbolo pa nos tur recorda nan y conscientisa nos tur cu hunto nos mester brinda amor y cariño na cada mucha riba nos isla. Esaki ta e compromiso di Gabinete Wever-Croes.