Nos por compronde e critica continuo cu e Parlamentario Wyatt Ras tin riba Minister Glenbert Croes. Su frustracion cu su mes, cu pa 8 aña largo el a sinta haci nada, tin Wyatt Ras cu e no por soporta cu Glenbert Croes si ta haciendo hopi mes y mucho mas den apenas un aña di Gobernacion.
Te dia di awe ora bo lesa reaccionnan di Wyatt Ras, bo ta keda babuca di e señora aki su ponencianan. El a contagia cu e sindrome di su lider: un desconexion total cu e berdad y cu e tristo realidad di nos Pais.
Nos ta manda Wyatt Ras lesa e rapport cu su Gobierno, cu su bendicion como Presidente di Parlamento, a laga sconde.
Aruba como pais y como pueblo, ta pasando den un era menos bunita, den problemanan hopi dificil, danki na e materialismo promovi pa AVP en bes di a inverti den fortalece e ser humano.
E gobierno di AVP a endeuda nos Pais surpasando e nivel aceptabel y responsabel, sin NUNCA a inverti un cen den sanacion social di nos Pais. Al contrario, a opta pa tapa e berdad cu klinker y asfalt. A opta pa sconde nos tristo realidad ainda den porta di eleccion.
E engaño aki, e trocemento di berdad aki, lo keda pa semper AVP su legado. Ta troce historia, ta troce e berdad financiero y a troce e realidad social cu e rementa den cara di nos Pais, nos Pueblo y Gabinete Wever-Croes riba 24 di november 2017.
Nos por compronde cu Wyatt-Ras ta frustra di wak un persona manera Minister Glenbert Croes sin background social algun, pero cu ta traha cu curason, ta logra hopi mas cu e propio Wyatt Ras cu ni como Presidente di Parlamento a haci nunca nada pa rescate social di nos Pueblo ni rescate financiero di nos Pais.
Gabinete Wever Croes si a demostra cu a pesar di CAFT (logro di AVP), a pesar di nos desastre financiero (logro di AVP), cu e Gobierno aki si ta pone miyones na disposicion di e cadena social. Nos no ta pretende di solucion’e den e gobernacion aki. Pero nos a y lo sigui percura pa hamas e candela cu e morto di Rishandroh y Roshendrick a cende, paga!
E tempo di hunga “mooi weer” a caba hunto cu AVP. Y cu cada bes cu surgi otro problema social, e ta refleho directo riba e ultimo 8 añanan di Wyatt Ras y su partido.
Por ultimo: Minister Glenbert Croes ta un gobernante transparente y p’esey e tin e organo mas halto di nos Pais esta Parlamento di Aruba, den persona di Sue-Ann Ras, ta controla kico tur ta haci, unda tur Aruba su placa ta bay. Un ehempel cu AVP por siña di dje cu por cierto ta tarea di Wyatt Ras tambe como Parlamentario.