CAYA BETICO CROES TA HABRI PA AUTO PASA DURANTE ALGUN ORA DI DIA
Despues di conteo di 3, Prome Minister Evelyn Wever-Croes a primi ‘Play” riba e tablet cu ta conecta na e sistema di sonido cu a wordo instala den Caya Betico Croes. Mesora mensahe di bon bini den Caya Betico Croes y deseonan di feliz dianan di fiesta a resona. Despues Prome Minister hunto cu Ministernan Otmar Oduber y Andin Bikker a habri nos Caya Betico Croes oficialmente. Un momento di emocion pa Gobierno sigur y pa tur esnan presente pa wak nos centro di ciudad habri pa vehiculonan pasa pa algun ora durante mainta y anochi.
Vision di Gobierno ta pa trece bida bek den nos centronan di ciudad. Diahuebs atardi un biaha mas Gobierno di Aruba ta cumpli cu nos pueblo na unda ta apunta cierto orarionan pa asina pueblo por pasa den nan auto hunto cu famia no solamente pa disfruta loke tiendanan tin di ofrece pero pa hopi ciudadano di nos pais, esaki ta trece recuerdonan bunita di con nos centro di ciudad di Oranjestad tawata antes.
Cu e vision aki den su maneho, Gobierno di Aruba ta anuncia cu Caya Betico Croes ta habri pa autonan pasa entre 6:00 AM te cu 9:00 AM y 6:00 PM pa 9:00 PM. Truck y vehiculo grandi / pisa no ta permiti pa pasa den caya Betico Croes. DOW lo tin borchi pa indica esaki.
Ademas di a habri Caya Betico Croes na e orarionan menciona, a instala speaker den henter Caya Betico Croes na unda por scucha diferente mensahenan y bon deseonan pa dianan di fiesta nos dilanti y tambe canticanan di Pasco lo resona henter e temporada aki.
Prome Minister Evelyn Wever-Croes den su mensahe, a felicita pueblo di Aruba y a encurasha nos comunidad pa sali keiro hunto cu famia y pasa den nos centro di ciudad y experencia e ambiente dushi di fin di aña hunto.