Apesar cu apenas na augustus ultimo e fondo presupuestario di Crisis Plan Social a keda aproba den Parlamento di Aruba, ya por a ripara basta mobilisacion y implementacion di cierto aspectonan di e plan di crisis social. Manera a menciona, un di e puntonan importante ta e reunionnan mensual di tur e partnernan den e plan di crisis social cu tin como obhetivo pa sigui coordina y sincronisa esfuersonan pa optimalisa e structura di trabou pa asina por logra un miho registro y crea mas eficiencia entre tur partners trahando riba e tereno social.
Metanan specifico di e crisis plan social ta intervencion den y prevencion di e crisis social. Esaki ta wordo logra door di elimina riesgonan y enforsa proteccion den hogar, na scol y den bario. E cuatro sectornan cu ta forma un cadena profesional, esta social, huridico, enseñansa y salubridad ta trahando structuralmente hunto pa prome bes. Esaki ta 28 departamento gubernamental y no-gubernamental (fundacionnan).
Tin un plan di vision pa trahado social y enseñansa (Supporting Troubled Families). Departamento di Asunto Social (DAS) a expande trahamento di 3 districto pa 4 districto. DAS hunto cu DPL y DAO a cuminsa cu un trayecto di maneho (modelo di Nacionnan Uni) hunto cu tur gremio relevante pa analisa e trayecto di e hoben for di scol pa trabou pa mira con mehora nan posicion na scol y riba mercado laboral. E tres departamentonan aki a cuminsa cu un segundo grupo cu ta consisti di mamanan soltera, pa guianan pa un trabou. A cuminsa un cooperacion entre DAS y scolnan, pa alumnonan cu riesgo halto por haya ayudo. A cuminsa traha riba e lista di espera di departamento di Asunto Social y Bureau Sostenemi cu ta encera e mucha y hobennan special. E tempo di espera na cierto departamentonan gubernamental a wordo reduci. Un siman special dedica na Lantamento di Mucha a wordo organisa durante e siman di Dia Internacional di Derecho di Mucha den cooperacion cu diferente departamento y fundacion. Esaki ta pa prome bes cu Aruba ta organisa un siman dedica na mayornan y con pa duna nan guia den e proceso di lanta y educa nan yiu.
Ademas, training di terapia systematico pa famia y pareha cu problema y riesgo, a wordo organisa. A traha un plan di con pa reforsa e area di prevencion na Aruba. Prevencion semper ta mas efectivo. A cera un acuerdo cu Unicef pa cu siguridad di nos muchanan, e asina yama Child Protective System.
Minister Glenbert Croes ta expresa su gratitud y satisfaccion pa mira con e comunidad en general ta respondiendo na e yamada pa ta parti di e solucion ya cu e crisis aki ta afecta nos tur directo of indirecto. E ta responsabilidad di tur sectornan pa coregi y tambe pa den forma preventivo, evita pa situacionnan social indesea surgi. Ultimo dianan di november nos ta recorda cu ya un aña a pasa desde e tragedia di Rishandroh y Roshandrick. Mester sigui traha duro pasobra tur dia tin posibel victimanan cu ta por ta na peliger. Rapportnan cu lamentablemente a ser scondi door di e gobierno di AVP, ta duna un bista bastante preocupante riba e realidad di e crisis social ya di algun aña caba. Pero nan a prefera tapa y sconde e berdad amargo di y pa nos pueblo.
Minister Glenbert Croes ta invita henter e comunidad di Aruba, tur entidad den tur sector, clubnan di servicio, companianan y fundacionnan pa uni na e movimento di rescata nos muchananan, nos famianan, nos hendenan special, nos grandinan y tur cu di un forma of otro ta den un situacion social dificil. A yega e momento pa nos pone un banda diferencia di opinion, sea politico, ideologico hasta familiar, pa hunto schouder cu schouder carga e isla aki hib’e den un futuro unda nos tur por ta orguyoso di dje.
Nos tur tin un familiar, amistad, colega of conocir cu lo por ta pasando den momentonan dificil. Ban extende un man pa yudanan lanta bek riba pia y duna nan e speransa cu lo tin temponan miho nos dilanti.
