Home Sports FIFA topando cu islanan Caribense na Aruba FIFA ofreciendo guia pa...

FIFA topando cu islanan Caribense na Aruba FIFA ofreciendo guia pa finansas sostenibel den futbol

 

 

ORANJESTAD, Aruba – 29 di November 2018: Regularmente dirigentenan di e organisacion mundial di futbol, FIFA, ta bishita nos isla. E biaha aki ta pa un tayer specificamente riba “Financial Governance and Management” durante dos dia largo. Meta di e charla tabata pa atende asuntonan general identifica como parti di e proceso di auditorio y reportahe, mescos ta algun caso specifico entre e participantenan, relaciona cu maneho financiero di e paisnan miembro di FIFA.

 

E representantenan di FIFA a ricibi “feedback” di e forma con cada pais individual ta atende cu e maneho financiero impone dor di e organisacion mundial di futbol, incluyendo experiencia den e proceso di “audit” y reportahenan cu ta ricibi di cada pais miembro.

 

E paisnan participante tabata Aruba, Antigua Barbuda, British Virgin Island, Guyana, Jamaica, St. Kitts and Nevis y St. Vincent.

 

Christoph Suppiger, den su calidad di “Senior Manager Development Programmes” di e division di “Member Associations & Development” a duna di conoce cu regularmente ta tene e tipo di seminarionan asina pa garantisa cu FIFA y e paisnan miembro ta riba e mesun liña di pensamento relaciona cu maneho financiero. No ta un secreto cu FIFA tin un cantidad di programa den cual a aloca presupuesto pa cada pais, pa desaroya e nivel di futbol. Ta esencial pa e paisnan ta consciente cu nan no ta haya e placa tanten cu no aplica pa e fondonan aki. E aplicacion ta bin cu su condicionnan y proceso pa aplica y despues tin condicionnan y proceso con ta gast’e, con ta raporta e gastonan y con ta “audit” henter e proyecto, basa riba entrada y gastonan.

 

Ing. Richard Dijkhoff, Presidente di Arubaanse Voetbal Bond ta masha orguyoso cu FIFA ta sigui bishita Aruba como un forma di aprecio y sosten pa nos isla. Regularmente e organisacion mundial ta scoge Aruba pa su reunionnan y ta uza Aruba como un ehempel den Caribe. E biaha aki tabata un charla den con pa hiba un miho maneho financiero pa e organisacionnan di futbol den Caribe.

 

Na final di e charla, e participantenan a keda masha contento cu e contenido di e informacion ricibi pero tambe cu e hospitalidad cu semper Aruba ta brinda na nos bishitantenan.