MACUARIMA, ARUBA: Den un ceremonia special na Garage Centraal na Sabana Blanco awetardi Cuerpo Policial Aruba a ricibi 24 vehiculo policial nobo. Den presencia di Alto comisario Sr. Andrew Hoo, Vice Presidente di Isuzu Internacional Sr. Kentaro Yamamoto, Marketing Manager Rodney Kock, comisario di diferente departamento y agentenan di diferente districto a presencia e acto special di e autonan nobo pa surveillance dienst.
Despues di un destaho publico y a pasa pruebanan y screening nan necesario Garage Centraal Aruba cu e auto marca Isuzu MU-X a keda escogi. Dor di specialistanan di KPA mes cu condicion nan estricto a escohe e Isuzu MU-X pa surveillance dienst. Un vehiculo moderno y ekipa specialmente pa KPA.
For di man di Rodney Kock di Garage Centraal Aruba a haci e traspaso oficial di yabi pa Sr. Andrew Hoo Alto Comisario di Cuerpo Policial Aruba y na su turno a duna e yabi na man di Sra. Irma Gordon comisario di surveillance dienst.
Cu un brindis special den presencia di Sr. Yamamoto kende cu a keda impreciona cu un isla chikito manera Aruba cu su organisacion policial a escohe e marca renombra Isuzu pa ta e vehiculo policial.
Sra. Irma Gordon tabata tin e honor pa sende e Isuzu MU-X y cu zwaailicht y sirene e vehiculo policial nobo aki a Sali for di Garage Centraal Aruba pa asina por cuminsa patruya nos isla.
Cu e adkisicion nobo aki cada districto a ricibi nan flota nobo. Oranjestad ta ricibi 6, Noord 6, Santa Cruz 5 y San Nicolas 5 vehiculo policial.
Cuerpo Policial Aruba lo sigui eherce trabounan grandi pa asina mantene e organisacion policial bon ekipa. Mas blou riba caminda mas herment pa nos agentenan por traha cu ne. Nos agentenan awor tin un vehiculo policial adapta y cu por core riba e camindanan mas dificil pa por brinda asistencia policial.
