ORANJESTAD – Diamars atardi Minister di Deporte Sr. Dangui Oduber tabata presente na veld di S.V. Bubali na Noord. Minister Dangui Oduber a haci entrega di un bunita reconocimento na e directiva di S.V. Bubali den cuadro di nan 75 aniversario cu nan a cumpli 23 di September ultimo.
S.V. Bubali no ta un ekipo desconoci den e deporte di futbol na Aruba. Bubali a competi den division di honor casi ful su existencia y a titula campeon na varios occasion. Minister Oduber no ta desconoci pa e club como cu na mucha a hunga futbol pa e orguyo nan di Noord, Bubali y tambe a forma parti di diferente seleccion nan di futbol. Deporte ta tene nos hobennan activo y riba e bon caminda, asina e mandatario a trece dilanti. Como toke di aprecio pa tur e añanan cu S.V. Bubali a dedica na deporte Minister Dangui Oduber a haci entrega di diferente materialnan manera bala di futbol, pions, net y mucho mas na e club.
Finalmente Minister Dangui Oduber a manda palabra di pabien y gradicimento na e directiva y tambe na tur e coachnan cu ta duna tur dia di ora personal pa dedica na nos muchanan.
