ORANJESTAD, Aruba – E aña aki e clubnan di futbol afilia na Arubaanse Voetbal Bond (AVB) ta ricibi materialnan deportivo. AVB a traha riba e proyecto hunto cu CONCACAF y awo ta cla pa entrega e materialnan di futbol na e clubnan. E prome nan cu AVB a bishita ta SV RCA, SV Riverplate y SV Dakota, di cual e futbolistanan tabata entusiasma pa ricibi e materialnan.
Pa Ing. Richard Dijkhoff, Presidente di AVB, ta cu hopi orguyo e tabata presente na entrega di material na e organisacion di RCA, cu ta un di e organisacionnan di mas grandi di Aruba y bon organisa. Por medio di e yudansa di CONCACAF, awor AVB ta ofrece e clubnan diferente material pa nan por contribui na desaroyo di futbol.
E momento tabata historico pa AVB, pasobra ta prome biaha cu e federacion ta otorga material di e forma aki. Material cu e clubnan a ricibi ta bala, 2 gol grandi, 250 hashes, di cual diferente material cu ta brinda nan por medio di CONCACAF. AVB a traha hopi tempo riba e proyecto aki y pesey e Presidente a pidi clubnan tempo pa por a caba cu e diferente proyectonan aki. Awe AVB a demostra cu loke nan ta profilando den e ultimo añanan, trahando duro y awo ta concretisa proyectonan.
E muchanan tabata entusiasma di a ricibi e materialnan deportivo cu nan mester. Pa e teamnan material semper ta bon bini pasobra net ta kibra y balanan nunca ta suficiente. Material constantemente ta necesario, asina Richard Dijkhoff a expresa. AVB a entrega e prome materialnan deportivo, pero den transcurso di aña 2019 lo sigui entrega. Ta purba keda suministra clubnan material pa por traha na desaroyo di e hungadonan.
SV RCA ta contento di a ricibi materialnan cu AVB y CONCACAF a duna nan. Ditto Acosta, Presidente di e organisacion, cu tin casi 300 futbolista hoben, a indica cu material semper ta insuficiente. Pasobra golnan ta kibra, balanan ta kibra of gasto y tur ayudo ricibi ta mas cu bon bini. Ta gradici AVB pa su esfuerso pa por a yega na e materialnan aki.
Eurnie Panneflek, Presidente di SV River Plate, a expresa cu e materialnan deportivo ricibi for di AVB y CONCACAF ta un regalo y nan ta masha contento cu tur loke a ricibi. E ta un orguyoso p’e team di Madiki por a haya tanto regalo asina aki di AVB. Nan tin diferente division y pa esaki nan lo haci bon uzo di e materialnan aki.
SV Dakota tambe a ricibi e materialnan deportivo di AVB, unda cu Ferdinant Robert a expresa cu nan ta contento di ricibi esaki, cu sin duda ta yuda hisa e nivel di futbol na Aruba. Pa por haci un trabou optimal mester di material. SV Dakota ta gradici directiva di AVB, Richard Dijkhoff, e “competitie manager” Harvey Clement pa a haci esaki posibel na bienestar di deporte na Aruba.