ORANJESTAD – E reaccionnan ta mixto den cuadro di firmamento di e protocol, segun parlamentario Daphne Lejuez. Mientras cu tin comprension pa e sentimento contra Caft, y cu esaki ta mina nos autonomia financiero, parlamentario Lejuez ta enfatisa cu lo ta bon pa corda cu Caft inicialmente a wordo instala despues di un KB, pa motibo di mal maneho (ondeugdelijkheid van bestuur) di gobernacion anterior na 2015.
Pues, e parlamentario ta subraya cu e entrega di nos autonomia financiero a tuma luga cu firmamento di un protocol na 2015 bou gobernacion anterior. Contrario na esaki, e protocol cu a keda firma siman pasa, cual ta un resultado y continuacion di 2015, ta hustamente fiha un fecha unda lo por finalisa Caft y lo tuma bek nos autonomia financiero por medio di nos propio Begrotingskamer independiente, sin necesidad di representacion di Reino. “Pues realmente ta pone un plan den mocion pa netamente logra nos autonomia financiero bek cu a keda comprometi pa gobierno anterior”, parlamentario Lejuez ta comenta.
Falta di solucion structural di gobernacion anterior
Na 2015, Aruba a haya un KB pa motibo di mal gobernacion. E mesun aña aki a firma un protocol pa institui supervision financiero (Caft) unda cu a acorda normanan financiero proponi pa Reino. Bou supervisionn financiero di Caft, na final di 2017, Caft mes a constata cu e normanan proponi lo no por wordo alcansa, cu resultado cu gobernacion anterior a uza solucion cosmetico y no structural pa aparenta cu lo alcansa e normanan. Mirando cu no a logra e metanan proponi pa falta di solucionnan structural, gobierno actual mes a propone norma y metanan realistico por medio di un memorandum economico financiero (FEM) den presupuesto 2018. Esaki a bin pa reduci gasto y deuda, y di e manera aki pone Aruba bek den un posicion financiero y economico mas stabil.
Otro hechonan importante
Pa sigui cu e hechonan cu nos conoce, na fin di 2018 ta firma un protocol nobo, den cual ta keda palabra varios punto. Na prome luga, lo uza e FEM di gobernacion actual pa fiha e normanan nobo realistico (pues no normanan imponi pa Reino). Lo uza cifranan di presupuesto di gobierno pa 2019 pa fiha e punto di salida di un plan pa reduccion di gasto di personal, y cu esaki ta elimina e argumento di Caft pa 2018. Pa locual ta ‘meevallers’ enbes di 100%, 50% lo wordo aloca pa reduci debe pa di e manera aki laga 50% disponibel pa inversion necesario pa stimula economia y bienestar general di nos hendenan. Tambe lo evalua e rol y trabao di Caft di e ultimo tres añanan, como tambe na final di e acuerdo aki.
Aruba lo instala su propio Begrotingskamer independiente sin influencia di Reino, y cu esaki lo reemplasa supervision externo di Caft, defacto dunando Aruba su autonomia financiero bek, algo cu gobernacion anterior no a logra, segun parlamentario Lejuez.
A stipula cu cuenta anual 2020 lo ta e prome cu lo conta cu un declaracion di accountant, asina aki demostrando cu Aruba tin su maneho financiero na ordo y cu esaki tambe haciendo cu e trabou di Parlamento di control lo por conta cu datonan verifica.
Beneficio pa henter nos comunidad
Pues na final di dia, si e puntonan ariba menciona keda realisa, ken ta sali beneficia?
Parlamentario Lejuez: “Segun ami ta Aruba, cu aki tres aña lo por tin su autonomia financiero bek, su maneho financiero na ordo, un posicion financiero y economico stabil, y cu esaki un muestra di un gobernacion sostenibel y duradero cu ta beneficia henter nos comunidad. Win-Win!” E parlamentario ta sigui bisa cu: “Claro cu e lo no ta un propuesta facil, mirando e reto financiero grandi, pero e lo no ta imposibel. Cu vision y determinacion mi tin confiansa cu e gabinete aki, lidera pa Sra Evelyn Wever-Croes lo sa di produci un resultado na beneficio di un y tur.”