Gobierno a cambia, pero e mesun modus operandi cu e gobierno anterior ta continua. UPP kier a duna espacio na e gabinete actual, pa mustra kico ta su logronan den su prome aña di gobernacion, pa asina UPP por a bay analisa kico a wordo priminti, kico a wordo logra, kico no, y kico a haci pero cu NO a wordo primiti mes!
Despues di un aña di gobernacion no solamente e pasenshi di UPP parce di a termina, pero tambe di CAft. Dia 8 di November 2018 Caft a manda un carta pa gobierno cu a wordo interpreta como un intencion di parti di Hulanda pa bin cu un KB. Sorpresivamente den cierre di siman pasa, ta anuncia cu tin un acuerdo cu Hulanda.
UPP a tuma su tempo pa scrutina e contenido di e protocol y contrario na declaracionnan haci, UPP si ta considera cu parlamento, e organo mas halto di nos Estado di Derecho, a wordo hala un banda di un forma mahos y humiyante door di e protocol aki. Minister Presidente a trata na suavisa e decision tuma dor di degrada e embergadura di e protocol aki, pero e hechonan ta mustra riba un totalmente diferente scenario. Esaki UPP ta bisa basando nos mes riba e siguiente aspectonan:
* e protocol nifica un prolongacion di e control di Hulanda cu 3 aña mas;
* un muestra di falta di confiansa, pasobra ainda Aruba no ta merecedor di un “zachte lening” manera Corsou y St. Maarten;
* Rijksministerraad lo mester ratifica e acuerdo PROME cu parlamento haña e oportunidad pa hasi esaki (pregunta ta si Parlamento di Aruba a haya un promocion y bira un “koninkrijksorgaan” of ta gobierno di Reino a bay sinta den stoel di gobierno di Aruba?);
* lo cambia solamente art 14 di e acuerdo cu normanan stipula den protocol nobo. (Hustamento loke sr. Rocco Tjon a declara cu nan lo no ta dispuesto pa haci). Den dado caso cu esaki no pasa prome cu 1 di januari 2019, CAft lo sigui funcciona basa riba e protocol di dia 22 di november ultimo. Esaki ta pa evita cu wega lo wordo hunga dor di Aruba?
* otro muestra di falta di confiansa ta e ponencia di CAft cu e fondo di Plan di Crisis Social, tambe lo mester ta suheto na mas control, mirando cu a trata di saca esaki pafo di e presupuesto di Aruba;
* cu apesar gobierno lo institui un “begrotingskamer”, CAft lo keda sigur pa 3 aña mas den funccion. Kico lo bay bira e ora e autoridad y funcion di e “begrotingskamer”? Pues si Aruba keda cla cu su begrotingskamer p.e. na maart 2019, conforme e protocol aki, Caft lo keda existi cu tur su facultadnan!! Esaki ta otro muestra cu no tin confianza. Den e intervencion cu a tuma lugar recientemente na Boneiro, Hulanda si por a yega na un palabracion cu e gobierno di Boneiro pa stop e actual intervencion hulandes prome cu e fecha stipula den e convenio. Na Aruba nada di esaki ta ser menciona den e acuerdo;
* sr. Tjon y minister Maduro a fulmina contra e declaracionan hasi door di sr. Gradus di CAft, cu no a usa entradanan incidental extra ricibi den 2018 pa reduci e debe di Aruba. Den e acuerdo sinembargo ta ser stipula cu e gobierno di Aruba MESTER usa 100% di cualke entrada incidental no presupuesta, pa reduci e debe. Te hasta a papia cu esaki bou di ningun condicion lo no ser acepta dor di parlamento, como un norma nobo. Lo saca esaki for di e protocol?;
* CAft ta duna gobierno e ordo pa entrega na parlamento e cambionan den artikel 14 di LAft prome cu 31 di december 2018 y ta hasta duna instruccion na parlamento con mester adapta e Memorie van Toelichting. Pues e protocol aki ta duna INSTRUCCION na Parlamento kico mester bin den e ley y den e Memorie van Toelichting. Cu e protocol aki tanto e stoelnan di e ministernan como e stoelnan di e parlamentarionan lo ser ocupa dor di un otro. Lo saca e parti aki tambe for di e protocol?
Tur cu tur, e firmamento di e protocol aki ta enfatisa:
* un continuacion di e entreguismo di Mike Eman;
* un bofta den cara di e pueblo cu riba 27 di augustus 2015 a manifesta y protesta dilanti di Parlamento, na momento cu e ley di LAft tabata wordo trata den nos parlamento, cu a culmina na batimento y aresto di manifestante y unda cu hasta tironan a cay e dia ey;
Ta tristo atrobe pa constata con e gobierno cu otro signatura cu esun anterior, ta sigui wordo comanda y humiya. Y tur esaki pa motibo di mal gobernacion y falta di opcionnan, cu si a ser priminti durante e campaña electoral. Y pa colmo atrobe parlamento ta wordo hala un banda y mester “teken bij het kruisje”. Cu otro palabra e parlamento aki no solamente a para bira un “STEMPELPARLAMENT” di e gobierno POREDmep pero awor e ta tambe un “STEMPELPARLEMENT” di gobierno hulandes. Ta di lamenta con ta menospreciando e lucha tenaz cu e libertador di Aruba d.f.m. a hiba pa establece un Aruba orguyoso di su himno y bandera y su Status Aparte y awor aki dor di su propio partido!!!
25 di november 2018
Booshi Wever
Lider UPP
Brazil 163
Aruba, 2 november 2018