Plataforma Hobennan Profesional: E responsabilidad di un doño di trabou pa su trahadonan na pia di trabou

Na varios ocasion tin trahadonan cu ta haya un incidente na pia di trabou. Pregunta cardinal den e cuadro aki ta; kiko ta cai bou di e responsabilidad di un doño di trabou pa su trahadonan na pia di trabou? Nos lo trata di duna un contesta riba e pregunta aki basa riba articulo 7A:1614X  y hurisprudencia relaciona cu e tema aki.

Articulo 7A:1614X inciso 1 di nos codigo civil den ta prescribi cu e doño di trabou tin e obligacion di tuma e medidanan necesario pa e area di trabou, artefactonan of otro herment cu ta wordo usa pa eherce e trabou no causa ningun daño na e trahado. Esaki ta un responsabilidad cu ta cai riba e doño di trabou. Ki ora e doño di trabou ta para responsabel pa e trahado? Si no cumpli cu e responsabilidad ariba menciona e doño di trabou mester para responsabel pa e daño causa na e trahado durante ehercemento di su trabounan, segun articulo 7A:1614X inciso 2. E mesun articulo aki ta pone enfasis riba dos excepcion. Si dado caso e doño di trabou demostra cu e la cumpli cu e obligacion describi den inciso uno e ta exonera di su responsabilidad. E otro excepcion tin di haber cu e trahado mes. Si e doño di trabou demostra cu e daño cu e trahado a ricibi ta pa su mesun falta sea intencionalmente of propio imprudencia tambe e lo wordo exonera.

Articulo 1614x ta wordo reenforsa cu hurisprudencia. E casonan Perez/Casa Grande y Bayar/Wijnen ta pone enfasis ariba e responsabilidad di e doño di trabou. Den ambos hurisprudencia  e dono di trabou tin e responsabilidad pa tuma medidanan rasonabel y of necesario pa preveni cualkier tipo di incidente na pia di trabou. Advertencianan verbal of por escrito no ta suficiente, pa motibo cu e doño di trabou mester tene cuenta cu e ehercemento diario di algun tareanan laboral por hiba facilmente na descuido di e trahado. E punto aki ta rekeri pa e doño di trabou tuma medidanan di seguridad constante y efectivo a base di e tipo di trabou, e conosemento di e peliger, e gravedad di e consecuencianan y e fasilidad pa tuma e medidanan necesario.  

Plataforma pa Hobennan Professional (PHP) ta spera di por a informa e ciudadano nan un tiki mas tocante e tema di e responsabilidad di e doño di trabou y derecho di e trahado ora cu tin incumplimento. Cada caso ta depende di nan circumstancianan specifico. PHP ta trata na aplica e palabranan mas adecua na Papiamento ora di referi na e leynan of hurisprudencia ya cu esakinan ta den idioma Hulandes.  E no ta e intencion di PHP pa reemplasa ningun profesional cu ta defende nan clientenan den corte, sino pa e ciudadano tin un poco conocimento basico di nosleynan y su derechonan. Si e ciudadano ta sinti cu su caso ta uno cu mester di accion inmediato nos ta recomenda pa acudi serca un hurista of su abogado di preferencia. PHP tey tur diasabra di 2 pm – 4 pm na Cas di Partido AVP pa informa pueblo tocante temanan manera esaki y hopi mas.