Mi por a tuma nota di un entrevista di parlamentario Richard Arends riba 24 ora, y mi persona a keda boca habri di por scucha un persona asina bon prepara ta purba manipula mente di pueblo y ta kere cu e manera aki lo ta funciona. Si esaki ta funciona anto nos ta leu di cas. Pero lo mas sorprendente ta cu e persona cu boca grandi aki ta papia cu e lo para banda di nos y cu CAFT no por keda impone riba nos ora cu e kier, awor den un tono hopi abao, ta para hunto cu CAFT pa masacra e trahador humilde.
Realidad
Realidad ta cu parlamentario Richard Arends a lubida cu e tabata consehero di diamante di Mike Eman y despues su persona tabata Minister di Economia bou Gabinete Mike Eman II. Mas resaltante ta cu su persona tabata parti di tur decision manera e mes ta bisa di a pone riba 300 hende na trabao y sigur e tabata parti di e desaster financiero di pais Aruba. Y lo mas tristo ta cu Richard Arends ta lubida cu na 2017 e gobierno actual di MEP-POR y RED a tuma su responsabilidad over y a haña nan man mara cu un presupuesto supletorio cu un deficit di 155 miyon florin (-3.1% BBP), unda cu mester tabatin un deficit di apenas 25 miyon (-0.5% BBP). Esaki si el a lubida di bisa den e rapport di CAFT unda cu e ta bisa claramente cu den bista di e deficit na 2017, ta imposibel cu na 2018 pa compensa e deficit crea. Na 2018 mester tabatin 25 miyon di surplus (+ 0.5% BBP), pero realidad ta cu nos no a haña ningun presupuesto entrega y ta un concepto mal traha a haña y esaki tabatin un deficit di 275 miyon florin (-5.5% BBP) y unda cu como cu e norma di LAFT no ta alcansabel a yega na e entendimento cu lo baha esaki na nivel di 2017 y esaki den e e mesun carta di CAFT ta ratifica cu a logra di yega na 2.9% BBP cu ta den careda di 147 miyon di deficit. Nos gobierno a asumi responsabilidad di Richard Arends hunto cu Gabinete Mike Eman II di a laga un deficit financiero pa 2017 cu no tabata cumpli cu LAFT y igualmente pa presupuesto 2018.
Costo di personal
Remarcabel ta cu parlamentario Richard Arends no ta duna relato completo. Nos tambe ta keda preocupa cu subida di costo di personal, pero nos mester keda realistico tambe cu bo no por yega kita hende. Mi por a scucha Richard Arends ta hunga popular cu lo a kita 300 trahador, buta bou su nanishi y sin niun tiki berguensa ta bisa cu a emplea den careda di 300 hende y awo ta bin sin ningun prueba cu a hinca 300 hende of mas na lugar di esakinan. Nos lo haci su trabao di puntra si esaki ta berdad, pero berdad tambe ta cu den presupuesto 2018 Richard Arends mester por a lesa cu e post di mas grandi pakico e personal a subi na 2018 tabata pa dos klas di polis, docentenan nobo, esnan di landslaboratorium y den e mesun carta di CAFT ta menciona cu e post cu mas a crece den costo ta di Husticia. Pues ami si ta para cu nos ta hinca mas placa na overtime den esaki y pa trata na frena e HIGH SEASON cu ex Minister Dowers a laga atras y pueblo por wak cuanto accion di Guarda Nos Costa tin cu ta relata na e placa inverti aki. Awo si Richard Arends hunto cu CAFT no ta haña necesario pa tin un Aruba bou control, ta keda nan mal deseo pa pueblo pero ami si ta para pa esaki, mientras cu nos no a gasta ni un cen mas di locual nos como parlamento a duna Gobierno y esaki ta e caso tambe.
Populismo
Hunga populista no ta yuda e pais aki. Mi ta lamenta cu maske cu e desaster financiero cu Richard Arends a hiba hunto cu Mike Eman, mi a carga e speransa cu e lo madura y para firme cu nos pa nos autonomia financiero, pero mi tabata ekiboca pasobra den su mesun palabranan el a declara cu e mes a yuda traha riba e LAFT y e normanan cu e mes no a logra cumpli cu nan, pero locual e si a logra ta su propio bienestar financiero riba sufrimento di un pueblo, unda cu su persona a strica miyones di pueblo den nos NV’nan sin ningun remordimento. Pues di awo en adelante mi no ta spera nada mas di Richard Arends ni di fraccion di AVP pasobra e unico meta nan tin ta yega na poder pa sigui enrikece nan mes y sigur pa e bataya di CAFT, nos ni pueblo un biaha mas no por conta cu nan y esey nan a proba caba na augustus 2015 ora a aproba e LAFT y laga pueblo ser masacra cu golpi dilanti parlamento riba ordo di ex Minister di Husticia Arthur Dowers.