Siman pasa parlamento di Aruba a trata e ley “OLV-tot vaststelling van het saldo van de Exploitatierekening over het dienstjaar 2016 van Land Aruba”. Parlamentario Setty Christiaans-Yarzagaray y tambe demas miembro di fraccion di MEP no a aproba esaki. Apesar cu porta e ley mes ta pa stipula e exploitatiesaldo, e espirito di ley ta indica claramente cu segun Staatsregeling di Aruba ta exigi gobierno pa responsabilisa nan mes pa tanto entrada di pais Aruba pa e aña en cuestion como tambe pa gastonan cu a wordo haci den e aña y tambe cu Comptabiliteitsverordening (CV 1989) ta determina cu responsabilisacion ta wordo duna door di ofrece splicacion den e ley cu ta determina e exploitatiesaldo.
Kico ta un exploitatie saldo?
Esaki ta e diferencia entre entrada y gastonan y den e caso aki ta di pais Aruba. Momento cu gasto surpasa entrada ta significa cu tin un deficit. Enberdad mayoria pais desaroya sa experencia deficit pero naturalmente pa por cumpli cu finansas publico balansa, manehabel y sostenibel, mester tambe cumpli cu sea balansa neutral of entrada mester surpasa gasto pa evita cu debe di un pais ta bira asina hopi cu e ta impagabel pa su pueblo.
Deficit/Surplus, 2002-2009
Den e tabel adhunto por tuma nota di un serie di cifranan di deficit of surplus (financial deficit/surplus) segun informacion di Statistical Digest di Banco Central desde aña 2002 te cu 2017. Delanta mester indica cu aña 2008/2009 a experencia recesion economico mundial y tambe cu aña 2003/2004 a keda debenan grandi di e gobernacion anterior atras, manera Race track, garantia di hotelnan Beta, Ramada y Plantation, Fondo Desaroyo San Nicolas, Radar. Pero riba su mes por tuma nota cu den añannan 2002 pa 2009, e deficit tawata keda den un margen di 72.9 te cu 163.1 miyon di deficit bou circumstancianan porta basta normal di gobernacion teniendo na cuenta cu loke a wordo menciona anteriormente. Importante tambe pa remarca ta cu hasta durante e temporada di 2002 pa 2009 pais Aruba a experencia surplus den aña 2003 di 172.4 miyon y den aña 2008 di 51.4 miyon florin. Aki por tuma nota cu te cu aña 2008 e debe na GDP di pais Aruba tawata 41.7% y despues di e efecto di recesion economico mundial, esaki a resulta di ta 49.9% den aña 2009.
Deficitnan financiero, 2011-2017
Si observa e tendencia di deficit pa e temporada di 2011 pa 2017, por tuma nota cu e deficit financiero di pais Aruba a yega te na 443.3 miyon florin den un solo aña cu ta aña 2012. Por nota tambe cu den aña 2014 tambe Aruba a experencia un deficit financiero di 405.8 miyon florin, ademas di algun otro aña cu deficit a surpasa 300 miyon florin. Increibel cuanto deficit pais Aruba a experencia den e añanan di gobernacion di partido AVP y señor Mike Eman, cu ta netamente e motibo pakico awe Aruba tin un CAFT. Logicamente cu mester tuma nota cu desde aña 2015 pais Aruba ta bou supervision di CAFT. Ora tuma nota di e informacion den e tabel por observa tambe cu desde CAFT e deficit financiero a cuminsa bay bek den direccion cu e tawata den añanan 2000. Tambe por a observa cu den niun aña di gobernacion di partido AVP y señor M. Eman pais Aruba a experencia un surplus.
Ciclo di presupuesto y cuadro huridico
E Parlamentario a splica cu paar di aña pasa el a bay les di LOFA (Leergang Openbaar Financiën Aruba) tanto basismodule como e verdiepingsmodulenan y durante e lesnan aki el a siña den e module Begrotingcyclus pero tambe den e module di Wettelijke kader cu e ciclo ta cuminsa cu un aprobacion di presupuesto di pais Aruba y ta termina ora determina exploitatiesaldo pero responsabilisacion tambe ta parti di esaki. Esaki Controlaria General (ARA) tambe a indica den su rapport di investigacion riba e exploitatierekening. Durante e lesnan aki e Parlamentario a indica cu el a siña tambe e esencia di Trias Politica, cu ta e tres podernan den un pais, cu ta poder ehecutivo, poder legislativo y e poder hudicial. Esaki ta hopi necesario den un pais democratico pa democracia biba por medio di Checks and Balances.
Pa Parlamento cumpli cu su tarea di control riba presupuesto y finansas publico di pais Aruba, por recuri na su derecho di haci pregunta na ministernan, yama reunion di comision of publico, tin oportunidad pa haci un vragenuur. Tambe e por evalua e Uitvoeringsrapportage (UR) y awor hasta tin rapport di CAFT cu ta duna conesho riba e situacion financiero. E fraccion di MEP conhunto cu fraccion di coalicion hasta e aña aki a añadi un instrumento door di introduci e mocion den parlamento momento di tratamento di presupuesto 2018, na unda e ta urgi gobierno pa bin duna cuenta di nan finansas na mita di aña den Parlamento.