Un asunto cu ultimo tempo tin henter pueblo confundi ta e gastonan di personal di gobierno. Riba esaki e Comision di Supervision CAFT tabatin su remarke y criticanan alegando cu bao di e gobernacion actual e gastonan di personal mester ser reduci cu 14.2 miyon florin e aña aki ainda. Y naturalmente politiconan di AVP manera Marlon Sneek y Richard Arends a baha manera zamuro hambriente riba e topico aki y awor ta rogando CAFT pa den forma sin piedad manda un gran cantidad di empleadonan publico cas y/of corta den nan beneficionan. Segun e politiconan mediocre aki, e gobierno actual supuestamente lo a aumenta e gastonan di personal den forma astronomico, cual no ta basa riba berdad.
Aumento di 101 miyon den 4 aña
Hecho ta cu e ultimonan cu por papia riba aumento di gastonan di personal ta e politiconan di AVP. Pa comproba esaki cu cifranan concreto, partido MEP ta trece e siguiente tabel, caminda por mira con e gobierno di AVP desde 2010 en adelante a aumenta e gastonan di personal den forma nunca visto. Asina nos por mira con na 2013 nan a kibra tur record di gastonan di personal y a manda esaki te na 526.5 miyon florin. Comparando esaki cu locual Gabinete Oduber a laga atras di gastonan di personal na 2009 di 425.4 miyon florin, esaki ta un aumento barbaro di 101 miyon florin den apenas 4 aña di gobernacion di AVP. Pues no ta pornada cu Gobierno di Reino a claba Gabinete Mike Eman un KB na 2014 y cual tabata debi na nan maneho desastroso riba tereno financiero y tambe gastonan di personal.
AVP no a cumpli cu e norma di 5%
Fuera di esey e gobierno di AVP a conveni cu Hulanda na 2015 cu tur aña nan lo bay reduci e gastonan di personal cu 5%. Pero realidad ta cu na 2015, 2016 y 2017 nan no a cumpli cu e norma aki di 5%. Alcontrario na 2015 nan a aumenta e gastonan di personal cu 5.3%! Anto ta e tipo di hendenan aki manera Marlon Sneek y Richard Arends tin e bocanan di mas grandi pa cuestiona e gobierno actual pa loke ta e aumento di gastonan di personal. Hecho ta cu e gobierno actual di MEP-POR-RED ta trahando duro pa reduci e gastonan aki den forma consistente y asina nos por mira den e tabel adhunto con na 2019 e gastonan di personal lo ser reduci cu 1.2%.
Negligencia total di CAFT
Awor ta keda na e expertonan di CAFT pa analisa tambe tur e cifranan aki y comproba pa nan mes e forma negligente con nan a laga e gobierno di Mike Eman maneha e gastonan di personal y kende no a cumpli cu e compromiso haci cu Hulanda, esta di reduci e gastonan aki cu 5% tur aña. Si CAFT a controla y vigila e asunto aki di cerca, awe e gastonan di personal lo a yega na 434 miyon florin y no e 476 miyon florin cu e destructornan di AVP a laga atras na 2017. Y awe tambe CAFT lo no ta papiando di un reduccion di 14.2 miyon florin cu nan kier pa e gobierno actual implementa den algun siman di tempo. Si CAFT a haci su huiswerk den forma drechi y responsabel y no a sucumbi pa e regimen di Mike Eman, awe e gastonan di personal desde 2015 pa awor lo a baha caba cu 72 miyon florin, esta for di 506 miyon florin na 2015 te na 434 miyon florin na 2017! CAFT, bo t’ey?