Caft a publica su conseho riba e presupuesto supletorio di 2018. Ta constata cu gobierno NO a gasta mas placa cu locual a ser presupuesta pa 2018 y cu ta keda completamente dentro di e presupuesto cu Parlamento a aproba pa 2018.
Pero Caft no ta satisfecho cu gobierno no a baha gasto di personal mas. Gobierno a splica cu a purba kita hende di trabou pero varios a gana nan caso y mester a bolbe bek. Pues cu loke Caft kier NO ta posibel. Ademas Caft ta contra cu gobierno a institui e fondo separa pa e Crisis plan social. E Crisis plan social gobierno ta para firme riba dje y lo no lag’e bay pa nada ni pa ningun hende, sigur no pa Caft. A base di esaki Caft a duna un conseho negativo riba e presupuesto supletorio pa 2018. E consecuencia por ta un KB?
Di banda di gobierno e reaccion ta calmo pasobra gobierno sa cu el a haci tur posible y imposible pa maneha e desaster financiero cu el a hereda, por cierto desaster ocaciona bou nanishi di Caft cu e tempo ey a aproba tur cos. E desaster cu gobierno a hereda ta un desaster financiero, den cual cada dia mester paga sorpresanan adicional causa pa e gobiernonan anterior di AVP, di Mike Eman y di Henny Eman. Den e presupuesto supletorio di 2018 mes tin 5 miyon adicional cu mester a wordo paga pa garantianan di Sace di tempo di Henny Eman! Dentro di tur e desaster cu nos gobierno a hereda nos gobierno ta poniendo ordo. Gobierno no por pone ordo den 1 aña cu a wordo crea cu desaster di 8 aña.
Nos gobierno ta riba bon caminda. Nos gobierno ta dentro di e presupuesto pa 2018 y pa 2019. Pa 2019 ya caba por mira reduccion di gastonan di personal. Kiermen, no tin motibo pa panico. Ademas, e Crisisplan social ta prioridad pa nos gobierno, y no ta cambia nada na esey. Si un KB mester bin, ta pa motibo di e desaster cu nos gobierno a hereda cu no por wordo coregi den apenas 1 aña. Si e tin cu bin, lag’e bin. Nos a haci hopi esfuerso pa evit’e pero na fin di dia ta na Pueblo di Aruba nos gobierno mester responde y no na Caft. Sigur no Caft cu ta co-responsabel pa e desaster aki.
