Nos a yega un aña di gobernacion di MEP-POR-RED. Un aña cu no tabata facil den bista di tur e problema y retonan cu nos a confronta den e aña cu a pasa. Nos a topa cu un crisis financiero unda cu Aruba a conoce un debe na 90% di nos GDP, proyectonan cu nos tin di cuminsa paga cu tabata off balance manera Green Corridor, Watty Vos Boulevard y tambe hospital cu a yega hunto 80.7 miyon florin cu nos tin di paga tur aña y cu no tabatin e fondonan necesario pa esaki. Y debi na e situacion penoso aki no a keda nos nada otro cu aproba 2.5% di BAVP pa por cubri e deficitnan aki.
Problema y retonan
Banda di esaki nos a topa cu retonan den tur sector y primordialmente den e sector social, unda cu nos no kier pa ripiticion di casonan cu desenlace fatal, pero realidad ta mustra nos cu actualmente tin un bom social na Aruba. Nos a percura pa hinca 34 miyon florin parti den dos aña pa por alivia un poco e problemanan social cu a asota nos pais, y cu sigur un plan pa dos aña no lo ta suficiente, pero e ta un comienso y despues e intencion ta pa structura esaki pa por brinda e ayudo optimalmente pa un termino largo, cu nos por logra alivia e dolornan aki.
Otro reto grandi ta nos infrastructura unda cu den plan Bo Aruba a papia di inversion di rond 1.1 biyon florin pero realidad ta diferente unda cu awendia den mayoria bario tin problema cu camindanan den hopi mal estado y otro camindanan di tera, unda cu stof tin hopi hogar na werki.
Nos ta contento di wak movecion y sigur nos ta gradici Minister di Infrastructura cu e tiki recurso cu e tin pa cuminsa mobilisa. Nos a wak peticionnan haci den diferente bario di Santa Cruz cu a cuminsa haya asfalt entre nan Angochi, Macuarima. No ta locual nos ta desea, pasobra ta hopi peticion tin pero mi tin e siguransa cu den e añanan nos dilanti nos por wak nos careteranan den bon condicion. Y mi ta spera di por wak pronto asfalt riba diferente caminda di tera cu falta entre otro Sabanilla Abao-Santa Lucia, Cas Ariba, Macuarima, Jan Flemming y sigur e ultimo aki cu a ser gaña cu lo percura p’esaki den plan Bo Bario.
Peticion special pa fin di aña
Mi sa cu Minister di Infrastructura su fondonan pa locual ta careteranan ta hopi limita y cu ainda nos no a aproba presupuesto 2019, asina mes mi ta manda un peticion den nomber di habitantenan di Warawara pa si por drecha e caminda pa dianan di fiesta, pasobra ta un bario hopi bishita en conexion cu Parke di Luz Warawara y na e momentonan aki e caminda ta den hopi mal estado. Tambe esnan di Parke di Luz di Jan Flemming tambe ta desea cu kizas e aña aki pa haya poco asfalt, pero debi na tempo y presupuesto esaki por ta riba man, pero den un futuro cercano ta spera di por haya poco asfalt p’asina e accesibilidad na e Parke ta mas facil. Otro caminda cu tambe por pasa benta poco asfalt ta e caminda di Macuarima net pariba di Wema cu ta bay pa e conocido Dochi Lee, cu actualmente e caminda aki ta den un situacion manera cu ta riba luna bo ta core, esta yena cu buraco.
Deseo di Santa Cruz
Sigur deseonan ta wak careteranan cu ta ser hopi usa cu por conoce un mehoracion den esakinan y den esakinan bo ta haya di Cadushi Largo pa Angochi cu ta conoci pa Carnaval di scol, San Fuego, Picaron, Urataca, Warawara y Cas Ariba, Macuarima, Rooi Bosal, Balashi (direccion Rooi Frances) y hopi mas bario den Santa Cruz. Y e deseo di mas grandi ta di traha di ex Drive Inn te cu Piedra Plat den un Avenida, cu nos por yama Avenida Libertador Betico Croes, cu embeyecemento di esaki y crea e posibilidad di por cana y core bicicleta. Y nos no kier wak e den un PPP, pero kizas parti den diferente aña y na forsa di gobierno cu na final nos no tin debe y cu pueblo por disfruta di esaki den su totalidad.