Den cuadro di e trabounan desplega pa Minister Glenbert Croes, dialuna mainta trempan e mandatario a haci un bishita na e departamento di Asuntonan Social.
Manera ta conoci, e departamento aki a conoce añanan dificil di negligencia den e gobernacion anterior cu a cataloga e trabounan di e Departamento di Asunto Social manera un pret paket. E Departamento di Asuntonan Social tabata mester di hopi atencion tanto pa e edificio pero mas importante pa e aspecto humano y organisatorio di tur empleado cu ta traha cu amor y dedicacion. E edificio principal ta den un deterioro y mester atencion urgente. Mescos ta e parti di sistema di network y telefon cu ta di suma importancia pa e departamento desplega su tareanan pa comunidad. E aspecto di mas importante sigur ta empleadonan di e departamento cu apesar di e situacion a sa di eherce nan trabou pasobra nan ta na altura di e responsabilidad grandi cu nan trabou ta encera pa cu tur cliente. Asina mes Minister Glenbert Croes a demostra e compromiso na nan y a pone fondonan necesario pa poco poco atende cu diferente retonan cu e departamento tin.
E directie y empleadonan tabata contento cu Minister a dedica tempo na nan y a demostra un biaha mas e compromiso ya cu e Departamento di Asuntonan Social ta e departamento cu ta coordinando tur e esfuersonan pa atende cu e Crisis Social cu ta biba den nos comunidad.
Minister a probecha di expresa su aprecio y gratitud pa e esfuerzo cu cada empleado ta dedica na nan trabou y tambe pa e pasenshi ya cu e cuadro financiero di Aruba no ta duna e espacio ideal pa atende cu tur e retonan cu e rapidez cu ta desea.
Minister Croes a keda satisfecho cu e reunion y e feedback cu e la ricibi. E mandatario ta compromete pa sigui cu e contacto estrecho cu e departamento y keda monitor e progreso di e departamento su trabou.