ORANJESTAD, 19 di november 2018 – Ministernan y Parlamentarionan a bini hunto pa asina ricibi e grato bishita di e 5 landadonan di Crossing for Hope. Ta trata aki di Davy Bisslik, Deaxo Croes, Romar Arendsz, Gwendolin Kock-Croes y Stephan Thijsen. Durante e bishita a entrega e heroenan un reconocimento pa nan hazaña, unda cu a crusa landando di Venezuela pa Aruba, cu e meta di recauda fondo pa Wihelmina Kanker Fonds Aruba.
Presente na e bishita tabata t’ey tambe algun miembro di Parlamento, Minister President Evelyn Wever-Croes, Minister Glenbert Croes, Minister Rudy Lampe, Minister Xiomara Ruiz-Maduro y Minister Andin Bikker. Tur esnan presente a hiba palabra, demostrando nan elogio y aprecio na e landadonan. Minister President Evelyn Wever-Croes a hiba palabra y a splica con el a wanta su curason na momento di a tende e plannan di e landadonan. Presidente di Parlamento tambe a hiba palabra y a expresa cu como Arubiano, e ta hopi orguyoso. “Boso a laga un stempel atras, un ehempel cu ta impagabel.”
Pa minister Dangui Oduber, e evento aki tabata inspiracion den tur sentido di palabra. Por a mira un union increibel den comunidad y por bisa cu Aruba henter a biba cu e momento. “Nos ta sumamente orguyoso di boso determinacion y perseverancia”, Minister Dangui Oduber a expresa. E mandatario ta corda e momento cu e landadonan a bishite pa papia riba e plannan, e training y e ruta. Ora di a recorda e momento aki, e mandatario a expresa cu nan “sigur ta heroenan Arubiano pa logra e hazaña aki”.
Na final di e bishita, Gobierno di Aruba a gradici e landadonan y a entrega nan un reconocimento den forma di un landado den awa, como muestra di ta Arubianonan ehemplar.
Danki pa pone Aruba su nomber dilanti y inspira tanto hende! E hazaña heroico aki ta demostra cu si bo pone bo mes pa haci algo, bo ta logre.
