Oranjestad: Diasabra atardi den careda di 5’or e sospechoso Raymy Hernandis den compania di su abogado Mr. Chris Lejuez, a presenta na Warda di recherche na Frankrijkstraat y a entrega su mes na autoridad.
Raymi ta e sospechoso principal envolvi den e tiramento cu den oranan di Diasabra merdia a tuma lugar den Caya Juancho Kock na Dakota.
Raymi aparentemente lo ta e persona cu a los 3 tiro riba Luis Maduro, kende a keda seriamente herida y ta na hospital luchando pa su bida.
Segun nos a compronde e victima y e sospechoso no ta biba leu di otro. Luis Maduro ta biba den Caya Papa Juan Pablo (Ex Rondweg) y aparentemente Raymi su pareha of si no ta Raymi mes lo ta biba den Caya Juancho Kock. E motibo di e problema entre nan dos lo tin di haber cu un debe bieu di un scooter cu Raymi lo a cumpra di Luis, basta aña pasa. Segun Raymi ela paga Luis full su cent y segun Luis cu no ta asina. E problema a keda escala cu te Luis lo a menasa Raymi cu morto.
Diasabra merdia e problema a bay completamente for di man na momento cu Raymy lo a los 3 tiro riba Luis.
Luis Maduro ta e persona cu basta aña pasa, a los tiro den Ex Havana Nightclub ( Awo Nikky Beach) den cual un dama hoben inocentemente durante un fiesta a perde su bida. Pa e asesinato aki Luis Maduro a ricibi un castigo di 10 aña di prison, ela sinta su castigo y tin algun aña caba cu e ta den libertad.
Informacion cu a ricibi di vocero policial ta bisa cu Luis Maduro su situacion ta critico.
