Caya Juancho Kock – Divi Divi Straat – Diasabra merdia un biaha mas Aruba a bay ariba su cabes, momento cu varios tiro a cay den Dakota.
Tawata den careda di 1:30 p.m, cu varios tiro a cay den Dakota pa ta exacto un caya dilanti Caya Juancho Kock 18 esta Divi Divi straat.
Na e sitio nos a compronde di habitantenan cu lo tawata tin un discusion of un pelea.
Despues nan a scucha tres tiro y a pensa cu lo tawata klapchi, pero esaki no tawata e caso.
Despues cu e victima a wordo tira ela core bula den cura di un cas y tawata sangra profusamente.
Habitantenan mirando e cantidad di sanger bou nan veranda mester a usa slang pa laba esaki.
Despues di esaki no ta conoci con e victima herida pa un of mas bala ta logra yega warda di polis na Playa.
Mesora esnan na warda ta bati alarma pa un ambulance cu maximo urgencia.
Den entrada por mira basta sanger y polisnan mester a usa awa cu mop pa por a haci esaki limpi.
E sitio unda e incidente a pasa a wordo cera, pa asina investigacion lo mester determina kiko a pasa.
Paramediconan a transporta e victima cu urgencia pa hospital.
