ORANJESTAD – Departamento di Asunto Social (DAS) a tuma nota di mal informacion cu ta ser duna referente servicio di bijstand na San Nicolas, door di entre otro un Parlamentario y e medio di comunicacion Bon Dia Aruba. E impresion cu ta ser crea, ta cu a stop servicio di bijstand na San Nicolas. DAS ta refuta e informacion eroneo aki.
Pa basta luna caba DAS ta enfrentando e reto di personal y a bin ta busca solucion activamente pa esaki. E situacion a presenta despues di entre otro diferente morto di colega den seccion di bijstand. Poco poco e trabou a cuminsa bira mas y mas pisa pa e resto di consulentnan di bijstand, pa cual a opta pa sigui cu e servicio pero por medio di un cita. Despues di un trayecto largo di un aña y mei pa haya dos persona, luna pasa e personanan aki a cuminsa nan proceso di entrenamento.
E servicio di bijstand ta algo cu ta wordo reglamenta den ley. Esaki ta trece cu ne, cu cada un consulent cu ta traha den e seccion aki mester sa e materia completo, ya cu un desviacion nifica directamente cu e ambtenaar ta kibrando ley cual ta castigabel.
Na e momento aki, e Departamento tin e dos personanan menciona, den training pa por yena e bashi cu tin. E proceso aki ta tuma algun luna, pa asina garantisa cu tanto e cliente como e ambtenaar ta cumpli cu loke ley ta stipula. Na momento cu e personanan aki ta cla, e servicio di bijstand lo continua manera antes.
Ta pidi tur persona cu ta Pariba Di Brug pa tene na cuenta cu pa por haya informacion tocante bijstand mester acudi na Playa. Pa loke ta e parti di ‘intake’ (entrevista) oficial pa por haya bijstand, of otro rekisitonan, esaki ta pasa na San Nicolas mes pa medio di un cita. Tur otro servicio di otro seccion den DAS na San Nicolas, ta sigui normal.
Locual tambe ta importante pa informa ta cu ningun oficina di Gobierno cu DAS su seccion di bijstand ta traha cu ne, no ta situa na San Nicolas, pues eventualmente e cliente mester bin Playa pa busca documentonan necesario pa bijstand.
Por ultimo DAS ta pidi tur Parlamentario, prensa y/of instancianan pa tuma contacto cu nos vocero na telefon 528-1100, na momento cu tin un duda of kier haci un pregunta pa un publicacion, pasobra profesionalmente locual ta corecto ta ‘hoor en wederhoor’.