Maestra na Washington Kleuterschool, Janirra Kock ta conta: “Esaki ta mi di 7 aña trahando na Washington Kleuterschool. Actualmente, mi klas ta consisti di 27 mucha di grupo grandi.
Na nos scol nos ta traha hunto na bienestar di nos alumnonan. Nos ta sinta tur luna hunto pa traha e plan di luna. Pa medio di e plan di luna, nos ta traha nos plan di siman. Tur maestro mester entrega su plan di siman riba diaranson di e siman prome, ya asina e cabesante ta control’e y pa bo cuminsa cu ne dialuna di e siman sigiuente. Esey ta duna nos chens di traha material si ta necesario den weekend. Trahando un plan di siman trempan ta duna e maestro espacio pa dedica su tempo cu su famia y sigur pa su mes. Tur dia mi ta controla mi skema di e dia siguiente y pone tur cos cla. Mi ta traha cu mi plan di siman band’i mi y ta controla ki les ta sigui. Mi sa mi rooster casi for di mi cabes caba, pero asina mes mi ta controla kico ta mi siguiente les. Mi dia na scol ta pasa hopi lihe. No ta tur dia ta bay mes bon cu bo a planea, tin cosnan cu por pasa inespera den bo klas. Semper tin solucion pa tur cos.”
IPA ta invita tur studiante di HAVO, VWO y MBO nivel 4 y tur otro persona interesa pa cuminsa un estudio pa maestro pa asisti na IPA su Dia Publico (Open dag) dia 17 di November 2018. IPA su Dia Publico lo ta di 10or di mainta te 2or di atardi na IPA (Isaac Wagemakerstraat 11, San Nicolas).
Durante e Dia Publico lo duna informacion di e estudio di Maestro pa Enseñansa Primario, Bachelor Hulandes y e curso di PDG. Tambe lo duna informacion tocante e Test di admision y 21+ Toets. Naturalmente lo tin oportunidad pa inscribi como studiante. Pa por inscribi na IPA mester trece e papel di registro civil (papel di AWG 5). E gastonan di inscripcion ta AWG 75,-. Pa inscripcion di e estudio di Maestro pa Enseñansa Primario y Bachelor Hulandes mester bin cu copia di diploma di sea HAVO, VWO of MBO nivel 4. Pa inscripcion di e curso di PDG mester bin cu copia di diploma di sea HBO of WO.
Banda di esaki por cera conoci cu e instituto en general y e ambiente estudiantil en particular y conoce nos facilidadnan. Ademas lo tin oportunidad pa combersa cu nos studiantenan actual. Tambe lo tin un ‘Food & Bake Sale’ organisa pa nos propio studiantenan. E benta di cuminda aki tin como meta pa recauda fondo pa e studiantenan di aña 3 cu pronto lo biaha pa exterior pa nan pasantia internacional. Di e manera aki IPA ta brinda henter Aruba un dia special di orientacion, yen di informacion y actividad.
Pa mas informacion por tuma contacto cu Studenten Services na 5243100 of por bishita nos pagina di facebook ‘Instituto Pedagogico Arubano’ of nos website www.ipaaruba.com.