ORANJESTAD – Minister di Turismo Sr. Dangui Oduber ta hopi satisfecho di por mira 4 barco crucero. Un gran cantidad di turista crucero a bishita Aruba riba diaranson. Turismo di Aruba ta pasando den un di su mihor momentonan, tur indicador turistico ta demostra esaki. Turismo crusero no ta keda afor, e cifranan tur ta indica cu e ta bayendo hopi bon e aña aki. Tur e bishitantenan aki ta contribui na un manera positivo na economia di Aruba. Un total di 8398 turista crusero riba nos isla sin inclui e trahadornan di e barco.
– Rotterdam a trece 1150 turista crusero
– Freedom of the Seas a trece 4420 turista crusero
– Monarch a trece 2708 turista crusero
– Freewinds 120 turista crusero
Minister Dangui Oduber a trece dilanti cu Turismo Crucero ta un industria cu, durante temporada crucero 2017/2018, a aporta cu $102.8 miyon na e economia di nos isla, esaki ta un aumento di 43% compara cu temporada 2014/2015 segun investigación haci pa Business Research and Economic Advisors (BREA). E meta ta pa converti e turistanan crusero den turistanan stay-over. Pa haci esaki posibel cada persona na Aruba mester duna e turista e mihor experiencia posibel pa nan bolbe regresa nos dushi isla. Pueblo mester ta consciente di e importancia di e sector turistico aki. Finalmente e Mandatario a menciona cu e lo sigui haci su máximo esfuerso pa trece e turistanan di calidad na Aruba.