Carnaval 65 a inicia diadomingo 11 di november cu un magno evento na Carnival Village na San Nicolas. 11-11 ta conoci come e fecha cu ta duna inicio na e temporada di Carnaval tur aña. Cu e organisacion SMAC, 11-11 a haya un buelta diferente y grandi na unda cu na aña 2014 pa prome biaha a introduci un evento pa honra nos legendarionan di Carnaval.
Nos comunidad ta conta cu hopi personanan kendenan a contribui grandemente pa engrandece nos fiesta cultural di mas grandi. Aruba ta gradici na cada persona cu a aporta na nos Carnaval durante e 65 añanan cu a pasa. Pa e motibo aki tambe Stichting Maneho Aruba su Carnaval, SMAC desde su inicio a introduci ‘Legends Festival’ pa honra legendarionan carnavalesco den nos comunidad pa nan aporte na nos fiesta cultural.
E legendarionan di Carnaval cu a ricibi honor e aña aki ta señora Inky Richardson, señor Chicho Kock, Dushi Carnival Group y señor Fernando Hodge. Den nomber di e pueblo di Aruba, masha danki pa boso esfuerso pa duna realse na nos cultura, na nos Carnaval.
A keda confirma cu e aña aki compara cu tur e añanan anterior, Legends Festival tawata mas grandi cu nunca. SMAC ta gradici tur esnan cu a haci e anochi aki asina grandi.
Danki na tur musico cu a trece e ambiente di carnaval. Gruponan di carnaval tawata spectacular cu e presentacion di nan pañanan pa carnaval. Danki na Popcorn Dancers y Coco Rico Dancers. Danki na tur e bandanan cu a pone e publico riba pia henter e anochi, entre otro BMW, ‘N Fuzion, Tsunami 4K, e show spectacular di nos All Star Brassband, Musical Time cu ta bini bek cu su dedicacion na C65, Le groove cu a cera e anochi musical cu nan canticanan hit. SMAC ta gradici tambe nos MC nan Ruben Scorpio Garcia y Mighty Campo kendenan a entrene e publico henter anochi.
E anochi no por a termina sin e bunita show di ‘fireworks’. Danki special na nos sponsernan di Carnaval, Gobierno di Aruba, Setar. ATA, Aruba Bank, AAA, Musica Y Revlon.