ORANJESTAD – Ayera Parlamento a cuminsa trata clausura di e ciclo presupuestario di aña 2016. E reunion di ayera tabata tin como meta pa aproba e saldo di e ultimo parti di ciclo presupuestario di 2016. Parlamento a constata cu gobierno anterior a surpasa e presupuesto cu nan a presenta cu 10 miyon, algo cu nan no por haci sin aprobacion di parlamento.
“Pues akinan gobierno anterior a bay contra ley di contabilidad. Si nos aproba e ley manera cu e ta awor aki, kiermen nos ta aproba e maneho cu a wordo hiba cu resultado di e 10 miyon adicional aki”, parlamentario Daphne Lejuez ta comenta.
“Un resultado pa motibo di falta di transparencia, falta di informacion como tambe contra principionan di bon gobernacion”, e parlamentario ta sigui bisa. Esaki tambe ta bin dilanti den e rapport di Algemene Rekenkamer cu a bini hunto cu ne unda a keda constata cu gobierno anterior a comete actonan contra ley di contabilidad por medio di tuma decisionnan sin aprobacion di parlamento, y no a rectifica esaki tampoco na tempo anto a manda e jaarrekeningen manera cu e ta.
Falta di bon gobernacion
Manera menciona, hunto cu e cuenta anual, Parlamento a ricibi entre otro rapport di ARA reaccionando riba e cuenta anual di 2016. Rapport di ARA a constata falta di transparencia, splicacion y te hasta maneho ilegitimo, asina aki accentuando falta di bon gobernacion.
Un hecho importante ta cu a constata cu a surpasa e presupuesto cu 10 miyon florin, sin aprobacion di parlamento, algo cu ta en pugna cu nos ley di contabilidad, tur esaki bao supervision financiero di cerca di Caft. Mientras cu en berdad pa locual ta trata e parti administrativo, tur e gastonan y entradanan ya a wordo haci y ricibi.
“Nos ta den un situacion awe cu como Parlamento nos mester tuma un decision si ta bay acepta e hecho cu a surpasa e presupuesto cu 10 miyon florin sin aprobacion, of ta desaproba e resultado aki – pasobra e hecho cu a surpasa e presupuesto, sin remediacion anterior, mi no ta sinti cu ta algo cu por wordo ignora”, parlamentario Lejuez ta subraya.
Preguntanan haci na gobierno
Parlamentario Lejuez ta trece dilanti cu e pregunta cardinal ta keda – kico lo ta pues e consecuencia di no aproba e ley pa fiha (stel vast) e resultado di e cuenta anual 2016? Pero tambe, kico ta e consecuencia di aproba e ley aki, a sabiendas cu e maneho cu a hiba na e overschrijding a conduci cu a actua en pugna cu nos ley di contabilidad y contra principionan di bon gobernacion. A puntra mandatario encarga cu Finansas pa splica esaki. Mirando cu falta informacion y transparencia pa por compronde con e maneho ilegitimo hiba na 2016 a hiba na surpasa e presupuesto, bao supervision di Caft – Parlamentario Lejuez a pidi minister pa duna un splicacion riba esaki pa asina por forma un opinion balansa. “Pues con y na kico e overschrijdingnan aki a tuma luga den cada ministerio concerni cu a conoce un overschrijding. Esaki ta pa asina por compronde unda a bay fout, y sigur tambe pa por presenta parlamento con lo corigi esaki pa sigura cu e no bolbe sosode den futuro”, parlamentario Lejuez a trece dilanti. Por ultimo, parlamentario Lejuez a puntra kico ta minister su opinion den cuadro cu e overschrijding cu a tuma luga, y si minister mes ta sinti cu e maneho ilegitimo aki ta bay contra nos ley di contabilidad y principio di bon gobernacion merece di wordo premia cu un aprobacion.