ORANJESTAD, Aruba – 13 di November 2018: Seleccion Nacional di Arubaanse Voetbal Bond (AVB) a biaha pa Corsou. E Seleccion Nacional ta bay cumpli cu nan di 3 compromiso den CONCACAF Nations League. Na Corsou e seleccion di futbol di Aruba lo ta enfrentando contra e team di Monserrat dia 16 di November proximo.
E team ta bon prepara pa e competencia aki y un biaha mas e hungadonan di Hulanda a bin reforsa e seleccion di Aruba, asina coach assistent di e Seleccion Nacional, Marvic Bermudez, a expresa. Dialuna mainta trempan e team a biaha pa Corsou, unda nan lo ta preparando nan mes pa nan di 3 encuentro.
E seleccion di Monserrat ta un pais chikito, pero mayoria di e hungadonan ta forma hunga semi pro of den e amateur mas halto di Inglatera. E team aki ta un basta duro, pero e Seleccion Nacional ta bay todo por todo en busca p’e 3 punto pa ta bon para den e standing di CONCACAF Nations League.
Na e momentonan aki e Seleccion Nacional di Aruba ta na di 13 luga. Aruba mester gana e wega aki pa asina keda den e prome 12 team pa clasifica p’e siguiente buelta. E Seleccion Nacional a gana un wega y a keda empata. Pa por sigui e wega di Aruba contra Monserrat, por sign up di CONCACAF of por bay riba e website www.oz.com.