Actualmente no por papia di recesion economico!
Ta parce cu den e ultimo dianan aki e wantomba politico den Cas di partido AVP tabatin su efectonan negativo riba e mente di politiconan frustra y desespera manera e lider fracasa Mike Eman y tambe e parlamentarionan Marlon Sneek, Michael Lampe y Richard Arends – kendenan tur ta responsabel pa e deterioro financiero y economico di nos pais durante e añanan 2010-2017 – y cu awe cu nan kier manipula cu e berdad venenando mente di pueblo cu nos pais ta pasando den un recesion economico bao di e gobierno di MEP-POR-RED. Hecho ta cu tabata danki na nan incapacidad y mentalidad coruptivo nos debe nacional a aumenta di 46% na 2009 te 90% na 2017, algo nunca visto den historia di nos pais. Alabes e mesun destructornan aki a percura cu na 2014 nos tabatin un record mundial na deficit di -9.8%. Y awe sin ningun tiki di berguensa y cu nan cara laba nan tur den coro kier spanta pueblo di cu nos pais ta den un recesion economico.
Recesion ta ora tin 2 aña di caida di GDP
Ta p’esey lo ta bon pa MEP splica tur e ineptonan aki supuestamente bon studia di ki ora un pais ta den recesion. Si e politiconan mediocre aki por a sikiera google manera nan colega Benny Sevinger, nan lo por a haya sa ki ora tin recesion: “A period of temporary economic decline during which trade and industrial activity are reduced, generally identified by a fall in GDP in two successive years”. Pues pa por papia di recesion, mester tin durante dos (2) aña consecutivo un caida di e GDP real! Y den e publicacion ultimo di Banco Central, esta e Economic Outlook 2018 ta indica claramente cu bao di e gobernacion actual e GDP real na 2018 tabata -0.5% y na 2019 esaki lo bay ta positivo, esta 0.1%. Pues di unda tur e politiconan medicore aki di AVP a saca e conclusion cu nos pais actualmente ta den recesion, ta algo cu nan mester puntra e wantomba den Cas di partido AVP. Y siguramente e gobierno actual ya a presenta e 6 puntonan di maneho pa loke ta nos desaroyo economico pa e proximo añanan y cual lo sostene e GDP real positivo na 2019 en adelante.
Aumento di debe te na 4 biyon florin
Hecho ta cu e politiconan aki di AVP no ta splica pueblo cu e ultimo recesion economico cu nos pais realmente a conoce tabata hustamente bao di gobernacion di AVP caminda a registra un GDP real na 2015 di -0.4% y na 2016 esaki tambe tabata negativo di -0.1%. Pues durante dos aña consecutivo partido AVP a percura pa un recesion economico cu awe tanto nan ta papia di dje. Tur e politiconan aki mester tin berguensa pa crea e recesion aki bao di nan gobernacion, ya cu esaki tabata añanan cu nan a aumenta nos debe nacional den forma astronomico for di 3.869 miyon na 2014 pa 3.918 miyon na 2015 y a sigui aumenta esaki na 2016 te na 4.012 miyon florin. Y asina mes cu tur e debenan extra crea aki nan no por a desaroya nos pais economicamente y a percura pa nos pais cay den un recesion economico.
Cu e berdad presenta aki tambe partido MEP un biaha mas ta mustra pueblo con frustra y desespera e politiconan di AVP ta actuando den e dianan aki y con nan kier sigui manipula y malinforma nos pueblo. Pero hecho ta cu AVP no ta logra spanta e pueblo aki nunca mas!