Aruba a hereda un reto financiero causa den 8 aña cu no por wordo soluciona den 1 aña
Gabinete Wever-Croes a hereda hopi reto y desafio. Poco poco y cu pasonan grandi ta treciendo bienestar y progreso cu nos a priminti e pueblo di Aruba. E situacion cu a hereda no ta un di felicidad manera e gobierno anterior a propaganda. E realidad a bin na cla manera cu Gabinete Wever-Croes a cuminsa goberna. Un situacion sumamente dificil. Nos a hereda un reto financiero cu a wordo causa den 8 aña. Un reto cu no por wordo soluciona den un aña. Pero esaki ta un herencia cu no por wordo rechasa. E herencia aki ta basa riba e situacion financiero penibel cu nos a haya nos pais.
Na aña 2009, Gobierno anterior di MEP a laga nos pais cu un debe di menos di 45 porciento. Esaki kiermeen cu di cada florin cu ta drenta e economia, 45 cen ta bay pa paga debe y 55 cen ta bay pa inverti den comunidad. Gobierno di AVP a hisa e debe ta na 80 porciento den menos di 5 aña. Esaki kiermeen cu di cada florin cu ta drenta e economia, 80 cen ta bay pa paga debe y 20 cen ta keda pa inverti den comunidad. Mientras cu e debe a sigui crece e resto di añanan di gobernacion di Gabinete Eman.
Aparte di esaki, no solamente a laga un debe grandi atras, sino a laga atras otro debenan y a traha compromisonan cu no ta inclui den e debe cuanan ta e Green Coridor, Watty Vos Boulevard, tur Proyecto PPP. Esaki a trece cu ne tambe un situacion financiero sumamente dificil cu tin consecuencianan pisa pa nos pais.
Consecuencianan riba e tereno economico: Cu un debe halto asina, e economia no ta crece. Gobierno a encontra un situacion na unda tawata tin hopi cifra fictisio. Presupuestonan poni riba mesa cu no tawata cumpli cu locual tawata e realidad. Hopi biaha e Gobierno anterior a desvia di loke Banco Central tawata indica como crecemento economico simplemente cu e meta pa haci cifranan mas bunita cu nan tawata ta.
Tambe, Gabinete Wever-Croes a encontra un cantidad di compromisonan pa promove e maneho ‘Green” na unda a gasta hopi placa den atrae un pilar economico “Green” sinembargo te cu e dia di awe, nos no a mira e resultado di e miyones cu a wordo gasta y no a trece niun alivio economico. Gobierno anterior a lubida cu un dia ta e pueblo lo bay paga esaki.
“Esaki ta loke cu Gabinete Wever-Croes a bin encontra aña pasa cu nos a drenta gobernacion na november 2017 cu nos a huramenta. Manera cu nos a drenta e edificio di Bestuurskantoor, nos a cuminsa confronta e realidad: e retonan cu nos a hereda tawata real. Na e momento ey, nos a lora manga y cuminsa traha inmediatamente. Nos meta ta pa trece progreso y bienestar real pa nos pueblo y nos ta logra esaki tambe”, Prome Minister Evelyn Wever-Croes a duna di conoce.