Home Politics Segun Parlamentario Sue-Ann Ras (MEP): “Informacion pa crea sensacionalismo por crea panico, disgusto y preocupacion innecesario!”

Segun Parlamentario Sue-Ann Ras (MEP): “Informacion pa crea sensacionalismo por crea panico, disgusto y preocupacion innecesario!”

 

 

 

Oranjestad: Recientemente den prensa local y rednan social a circula un articulo, cu sigur a lanta hopi pregunta y preocupacion tocante un supuesto ‘situacion deplorabel’ na Scol Preparatorio Prome Paso. “Ta di lamenta si, cu no a busca informacion concreto for di e instancianan concerni, mirando cu ta trata di mucha y sigur ta trece preocupacion cerca e mayornan y comunidad”, parlamentario Ras a cuminsa na bisa. “Mi mes a haya masha hopi reaccion y p’esey mi a tuma contacto cu tanto SKOA, Minister Lampe y diahuebs mainta mi mes a bay e scol”, Sue-Ann Ras a sigui bisa.

Realidad ta, cu Aruba ta hayando awacero pa basta siman caba y ta e ultimo 3 simannan esaki a cuminsa tin su consecuencianan pa e scol. “Pa aclarea e situacion, mi a haya informacion cu ta siman pasa dialuna, esta 29 di october, a dicidi pa saca e muchanan for di klas y pasa nan den Sala Shoco, cu ta e biblioteca. Esaki ta door di e awacero continuo, unda cu awa a cuminsa pasa door di e kozijnnan y tabata forma plas chikito di awa den 1 klas. A tuma contacto cu SKOA y mesora nan a duna  atencion, indicando nan pa tuma e pasonan en cuestion, como un solucion. Mirando cu e awacero no ta stop, e murayanan tabata keda humedo. Di siman pasa diahuebs, ya caba contratista a bin pa cuminsa haci e trabaonan necesario pa remedia e situacion y e cabesante a tuma contacto cu Departamento di Salubridad, su sector di Higiena, pa nan bin wak y haci evaluacion di e situacion. Tur cos ta canando debidamente y den un tempo record. Tur cos ta indica cu pa dialuna proximo, e muchanan por ta bek den nan klas.” ta loke Ras por a haya como informacion. 
“Mas cu claro, como mayor, bo ta preocupa cu e situacion, specialmente cu nan ta sinti cu e situacion por perhudica e muchanan. Pero ta un situacion sigur cu, si tabatin un miho vision y maneho di mantencion na e scolnan, por lo menos por evita tipo di problema asina”, Ras a sigui bisa. Di unda exacto e informacion a sali, ta keda e pregunta, pero si ta lamenta, cu ta uza emocion y mal informacion, pa crea panico cerca e mayornan y comunidad, sin tin mester,” Ras a finalisa bisando.