Home Politics Rudy Richardson (MEP): “Ta tempo pa desaroya Aruba den su totalidad”

Rudy Richardson (MEP): “Ta tempo pa desaroya Aruba den su totalidad”

 

 

 

Gilberto François (Betico) Croes 1938-1986 e.f.m. a lucha pa Aruba ta un pais liber y ta hopi a lubida e lucha, e sanger derama, e añanan di sacrificio di e generacion cu a lucha hunto cu nos libertador. Den cada pais tin varios coriente politico pero cada generacion mester analisa y percura pa e mihor resultado pa nan pais y pueblo. Ora mi a dicidi di drenta arena politico di Aruba na aña 2001 mi no tawata sa cu internamente tawata tin tanto discordia y interes special pa desaroya Aruba den su totalidad.

 

San Nicolas a ser lubida

Despues di ciere di Lago na 1984 e districto di San Nicolas nunca a recobra su añanan di gloria y ami no por a acepta esaki. Mi no tawata interesa di bay biba afo na cierto momento, tampoco bay biba den otro districto di Aruba, pues e unico alternativa tawata pa lucha pa locual mi ta kere aden. Ta hopi plan varios politico a trece pero na final di dia niun nunca a wordo desaroya of mihor bisa kisas a introduci e plannan aki pero pafo di San Nicolas. Nunca e poder politico a duna San Nicolas su desaroyo pa combati desempleo, pobresa, discriminacion institucional. E unico cu a haci esey tawata nos libertador Betico Croes den su lucha pa independencia di Aruba. Betico tawata consciente cu si no tin un solo pueblo cu por identifica su mes cu su ortografia di Papiamento, Himno, Bandera y Escudo e lucha pa un pais liber lo bay perdi.

 

Etapa nobo pa San Nicolas

Movimiento Electoral di Pueblo ta den gobierno atrobe, e biaha aki den un coalicion di 2017-2021 entre MEP/POR/RED, un gobierno netamente eligi pa e pueblo di Aruba. Cosnan logicamente no por a sigui mesun rumbo di e ultimo gobernacionnan unda ta parce cu interes di Oranjestad y Noord so ta conta cu e spin off effect economico den un parti di Aruba. Cu candidatonan nobo riba e lista prestigioso di partido MEP nos por bisa awe cu nos ta riba un etapa nobo pa San Nicolas. Nos no kier mas segregacion economico na Aruba.  E ultimo rapport di CBS ta bisa cu San Nicolas Zuid ta e area mas pober di Aruba anto ta hustamente esaki tawata mi lucha pa casi dos decada directo y indirecto como candidato, activista y conciudadano pa reduci e desbalance social economico cu ta existi. Aruba mester wordo desaroya punta pa punta pa carga e necesidadnan economico di nos pueblo. Na aña 2018 no tin un notario na San Nicolas, imagina bo esaki con serio gobernantenan ta cu San Nicolas.

 

Fast Ferry y Mega Crucero

Minister di Transporte, Comunicacion y Sector Primario, sr. Crispin Romero ta bezig cu un parti hopi esencial pa cu San Nicolas su bida economico. Lo desaroya un waf y lo dun’e su mesun San Nicolas Ports Authority. Esaki lo mester ta un mega waf den mi opinion unda cu Fast Ferry hunto cu Mega Crucero por drenta den e waf aki y logico hopi mas. Ta hopi plan tin den e programa di gobernacion HUNTO PA ARUBA firma 17 October 2018. No ta tur cos por wordo logra den 4 aña pero nos mester por logra progreso mutuo general pa cu nos digno pueblo. Nos no por warda mas, no mas promesa bashi, no mas discriminacion institucional unda cu nos pueblo no ta yega di sali di un pobresa structural. San Nicolas Business Association a duna nan vision pa cu e parti economico di San Nicolas. Esaki ta cay den linea cu e vision di e actual gobierno. San Nicolas mester bira e ciudad di Innovacion y Cultura. Na Amsterdam, Hulanda e red light district ta wordo regula. Akinan na San Nicolas, Aruba niun hende kier papia di esaki, unda cu ta explota e ser humano pero mas tristo ta cu e ta wanta San Nicolas den un estado deplorabel cu hala di edificio cera y den mal estado.

 

Desaroyonan positivo

Den mi opinion mester hiba un dialogo nacional y cuminsa haci esaki un win-win situacion. Promenade kier su Ocean front board walk te cu e tankinan na Zeewijk. Nos kier nos IMSAN bira un Hospital y Turismo medico combina cu otro nichenan den Turismo manera Deporte. Minister Di Turismo, Salubridad y Deporte, sr. Dangui Oduber a presenta plannan pa cu IMSAN y tambe Sero Colorado. Minister di Infrastructura y Medio Ambiente, sr. Otmar E. Oduber ta compromete su mes pa sigui haci San Nicolas e di dos capital di Aruba y mester traha hopi riba infrastructura y vivienda pa cu San Nicolas. Barionan nobo di clase media y asfaltamento di tantisimo cayanan cu a keda atras e ultimo 100 añanan. Minister di Enseñansa, Asuntonan Intelectual y Desaroyo Sostenibel, dr. Armando R. Lampe ta duna San Nicolas su debido atencion riba temanan di enseñansa. Minister President y di Asuntonan General, Integridad, Energia y Innovacion, mr. Evelyn Wever Croes a presenta su plan atraves di AREA pa trece actividad economico bek den Oranjestad y San Nicolas. Mi ta pidi e pueblo di San Nicolas e sosten necesario pa nos por sigui traha pa desaroya Aruba den su totalidad.