ORANJESTAD (AAN)– Wendy ta e unico dama entre e 4 masculinonan cu lo crusa lama cu mesun corage y confiansa pa pisa suela di Aruba. E tin 41 aña di edad, casa cu Andy Kock y cu dos yiu muhe yama Florence y Gwennandy (respectivamente 18 y 16 aña). Mescos cu e otro 4 atletanan, durante e landa, cada 30 minuut e ta tuma pauze pa bebe y come algo. Locual Wendy ta come, cu ta cay bon den su stoma ta: patia, druif y apelsina. Tambe e ta come pan cu pinda of pan cu muisjes. Patia ta e fruta cu ta baha mas miho durante un landa di distancia largo, como cu e tin hopi awa. E ta bebe energy gel, grape juice, gatorade of softdrink cora. Awa si Wendy no sa bebe, e mester ta algo cu tin smaak y sucu. Wendy tin un forsa mental hopi fuerte. Ora e ta sinti poco cansa y ta sinti cu e stroom ta duru, e ta keda papia cu su mes y pone metanan chikito. Por ehempel, un di e biahanan cu nan a train distancia largo, nan a yega te Casa del Mar. Wendy ta conta cu e mester a lucha hopi pa percura pa yega. Sinembargo, e siguiente training largo tabata te Marriott, el a ripara cu el a yega den e area di Casa del Mar cu hopi menos dificultad. Esaki a dun’e un empuhe y a lanta e confiansa den su mes. Tambe Wendy ta keda corda ariba tipnan cu nan ta ricibi di Roly. Un di nan cu e ta purba practica ta pa percura pa cada brasada ta mas largo posibel. Desde chikito caba Wendy a logra haya diploma A te F di landamento. Wendy su prome competencia di landamento tabata na april di aña 1986. E tabatin apenas 8 aña. Esaki a tuma luga na POVA. El a gana 6 medaya di oro cual tur tabata den tempo record. Wendy nunca a stop di landa. Te dia di awe, cu 2 yiu grandi, nan ta entrena hunto. Sin laga afo, e ta un instructor di natacion escolar di profesion.

Wendy ta custuma di train tur diadomingo open water hunto cu tur e otro atletanan di Aruba Dolphins pa mantene e condicion. Un dia Roly mes a puntra Wendy dicon e no ta train hunto cu e otronan cu ta entrenando pa e hazaña. E no a pensa dos biaha. Wendy a acepta y asina e trainingnan a bira no diadomingo so, si no 6 biaha pa siman. Ademas, e ta sostene e meta principal, cual ta pa recauda fondo pa Koningin Wilhelmina Fonds (KWF). Wendy su mama mes a fayece di cancer ora Wendy tabatin apenas 8 aña. Awo cu e por contribui na e bon causa aki, e ta ofrece tur e sosten cu e por duna. Ora e ta entrena den piscina, su mente ta den blanco. Ora e ta entrena den lama, e ta wak abou, e piscanan/cualnan. P’e, e ta un aventura diferente como cu nunca bo ta haya e lama mescos. Tin parti ta calmo y otro parti ta bruto of tin parti tin stroom of coriente cual por ta na bo fabor of contra. Semper tin un pida cu nos ta yama ‘wasmachine’ cu sa ta calmo of e por ta riba ‘high speed’ tambe. Wendy a cuminsa entrena pa e hazaña aki na februari 2018. E tempo ey el a cuminsa train a base di e schedule di training prepara pa coach Roly specialmente pa e hazaña. Prome cu esey e tabata den training si, pero mas pa condicion. E parti mas duro di e proceso di preparacion ta lanta mainta trempan pa bay training di 4.30 am na piscina 3 biaha pa siman. E trainingnan di atardi ta poco mas facil pa cumpli cu nan. Ultimo periodo di preparacion aki nos ta haya dry-land training tambe.