Home Politics Parlamentario Sue-Ann Ras (MEP): ‘Un hazaña historico pa un bon causa...

Parlamentario Sue-Ann Ras (MEP): ‘Un hazaña historico pa un bon causa merece apoyo total di Aruba’

 

 

Oranjestad. Diadomingo ta un dia historico pa Aruba, mirando cu 5 landado lo ripiti e hazaña di 30 aña pasa di e  Roly Bisslik. Si bay bek na 1988, net e dia prome cu Roly mester a landa, tabatin awacero y mal tempo y lama tabata hopi bruto, unda na algun punto Roly a enfrenta ola di 7 pa 10 pia halto. Pero Roly su determinacion a surpasa tur e retonan aki. “Diadomingo awo, dia 11 di november 2018, Aruba lo por bolbe experiencia un hazaña historico.  Esaki sigur ta algo cu Aruba completo mester duna sosten, mirando cu e 5 atletanan en cuestion, Davy Bisslik, Romar Arendsz, Deaxo Croes, Gwendelyn Kock Croes y Stefan Thijsen, ta haciendo e hazaña aki, cu e meta principal pa yuda Wilhelmina Kankerfonds, yega na e fondonan necesario pa sigui haci nan trabounan boluntario den nos comunidad,” parlamentario Sue-Ann Ras a cuminsa na bisa.

 

Hazaña

“Aruba completo a biba e momento grandi 30 aña pasa, unda cu e meta principal tabata pa yega na un piscina olimpico pa e landadornan, unda mi mes tabata forma parti di e team di Aruba Dolphins”, Ras a sigui bisa. “Como landado den e temponan ey, nos no tabatin e privilegio pa landa den un pool, ya cu nos trainingnan tabata tuma luga den lama y 1 biaha pa siman, riba diamars, nos tabata train den e pool di POVA, mientras e competencianan internacional, tabata tuma luga den piscina. Na Savaneta y sigur ami, a lanta cu un admiracion grandi pa loke Roly a haci den pasado y ta haciendo ainda pa hopi aña caba den e mundo di landamento.  E biaha aki, Roly Bisslik a fungi como e coach principal di e 5 atletanan y sigur su experticio, experiencia y boluntad pa ripiti e hazaña aki,” Ras a expresa.

 

Donacion

No tin duda cu unda tin boluntad, disposicion, disciplina y determinacion, cos grandi ta pasa. E 5 atletanan aki sigur a sacrifica masha hopi mes di nan tempo y bida personal, pa un tremendo causa. “Cada ayudo cu cada un di nos duna, ta contribui na e meta final, specialmente mirando cu na Aruba ta hopi famia ta afecta pa e malesa di cancer y Wilhelmina Kankerfonds ta traha incansablemente y boluntariamente pa yuda y brinda sosten na e pashent y famia en cuestion”, segun Ras. Pues tur persona cu ta desea di aporta na e bon causa aki y alabes brinda sosten na nos 5 atletanan aki, haci bo donacion na cuenta di banco di Koningin Wilhelmina Fonds – KWF sea na CMB 60078005, Banco di Caribe 80710901 of Aruba Bank 2611450190, cada florin ta conta!