Home Local No tin base solido ainda pa finansas publico sostenibel den forma structural

No tin base solido ainda pa finansas publico sostenibel den forma structural

 

 

 

 

 

Oranjestad – Algemene Rekenkamer a publica su rapport encuanto e investigacion di e cuenta anual 2017 di pais Aruba. Den e rapport Algemene Rekenkamer ta indica cu gobierno ainda no a logra pone e base solido pa logra yega na finansas publico sostenibel y saludabel, den un forma structural, riba termino largo. E investigacion ta mustra cu no a alcansa e norma stipula pa ley encuanto e deficit di 2017. Enbes di e deficit di 0,5% di e Bruto Binnenlands Producto (BBP), a yega na un deficit di 2,2% di e BBP. Den comparacion cu e dos añanan anterior e recursonan incidental no a concretisa na aña 2017.

 

Mehoracion di e resultadonan financiero no a continua

E mehoracion di e resultado financiero cu tabata tin den e añanan anterior, no a continua na 2017. P’esey no por papia di un control structural di gastonan. Esey kiermen, no por bisa cu a tuma pasonan structural pa yega na un maneho financiero sostenibel y saludabel. Den e añanan anterior a conta cu recursonan incidental pa logra e deficit regla pa ley. Na 2017 e contratiempo den entradanan tabata tin un influencia negativo riba e deficit operacional. E deficit operacional di 2017 a mustra un deterioro compara cu aña 2016, siendo cu e deficit den e añanan anterior tabata mustra di ta bahando. Algemene Rekenkamer ta conclui cu na aña 2017 a conta grandemente cu entradanan relaciona cu e reapertura di e rafinaderia. Como cu esakinan no a concretisa, e influencia riba posicion financiero di e Pais tabata uno negativo.

 

Extra presion pa tuma medidanan

Algemene Rekenkamer ta enfatisa cu e situacion financiero actual lo bay pone extra presion riba gobierno pa loke ta trata medidanan cu mester tuma na 2018 y den añanan venidero. E tempo a yega pa en berdad tuma pasonan structural. Akinan lo mester persigi e meta comun. Pa yega na un finansas publico duradero y saludabel gobierno completo mester asumi su responsabilidad. Ta importante pa remarca cu esaki no ta solamente e responsabilidad di minister di Finansas, sino e responsabilidad di cada minister. Ademas, e ta un responsabilidad di Parlamento tambe. Door di conhuntamente carga e responsabilidad y tuma e pasonan necesario, lo por evita e consequencianan profundamente negativo. Esaki no ta beneficia solamente e gobierno den tur sentido di palabra, pero tambe e comunidad completo y futuro generacionnan.

 

Recomendacionnan Algemene Rekenkamer

Algemene Rekenkamer ta recomenda e ministernan entre otro pa haci un analisis profundo dentro di nan propio ministerio relaciona cu pasonan cu ta necesario pa tuma pa asina logra un maneho financiero sostenibel y saludabel. Tambe ta recomenda pa hunto busca un solucion pa supervisa e gastonan, specificamente e gastonan di personal di e Pais. Ademas, ta importante pa tene cuenta cu utilidad y necesidad ora di scoge alocacion di recursonan.

 

 

Ta recomenda e minister di Finansas en particular, pa tuma medidanan structural, pa loke ta un maneho financiero sostenibel y saludabel. Ta di gran importancia pa haci esaki door di dialoga cu e otro ministernan.

 

 

Asina ta crea un base di sosten y conscientisacion riba e necesidad aki. Den su encargo di supervisor financiero, ta recomenda e minister pa pone extra atencion riba e uzo di fondonan di e Pais. Tambe enfatisa e importancia pa economisa y pa apoya esaki, y ora ta necesario insisti riba e cumplimento cu e orden di ley.

Ta recomenda Parlamento pa hunto nan para fuerte y apoya metanan pa logra un finansas publico sostenibel. Ta importante pa ta critico y pa tene e meta aki na consideracion. Banda di esey, ta recomenda pa pone bon atencion na prioridadnan y opcionnan cu gobierno ta propone. Ta importante tambe, pa pidi e mesun atencion ora di e tratamento di e cuenta anual, cu esun cu tin pa e presupuesto di e Pais. Ora di e tratamento di e cuenta anual, sa surgi un momento importante pa ta mas atento riba e pregunta si a logra e metanan. Tambe e oportunidad pa analisa e motibonan pakiko esaki a sosode of no a sosode.

 

Reaccion di minister di Finansas

Minister di Finansas a reacciona riba e rapport di Algemene Rekenkamer. Den su reaccion e ta duna un splicacion riba e resultadonan di e investigacion. Asina ela aclarea e comparacion di e cifranan ora di calcula e norma di e LAft y tambe ela menciona e falta di normanan existente segun cual ta raporta e cuenta anual. E minister a anuncia tambe, un proyecto piloto pa drecha e ciclo di planificacion y control, y ta profundisa riba algun otro aspecto di e maneho financiero.

Algemene Rekenkamer ta expresa comprension pa e ponencianan di e minister, y ta ripiti un di su recomendacionnan. Tambe e ta reacciona positivo riba e proyecto piloto cu minister di Finansas ta presenta pa por drecha e cyclo di planificacion y control. Sinembargo Algemene Rekenkamer ta enfatisa cu e falta di normanan formal di raporta cu ta conta pa e cuenta anual di e Pais, no ta un situacion sostenibel mas. Esaki pasobra e normanan aki ta forma e base pa por controla e cuenta anual. Algemene Rekenkamer ta haya sumamente importante pa stipula e normanan aki dentro di un termino concreto.

 

E version digital di e rapport di Algemene Rekenkamer ta obtenibel via www.rekenkamer.aw