ORANJESTAD, Aruba – 8 di November 2018: E aña aki un biaha mas tabatin 2 dia di Aruba College Fair Aruba, unda cu diferente compania y scol a participa pa asina duna studiantenan ma informacion tocante trabou, funcionnan y scolnan den exterior y Aruba mes. Dr. Horacio E. Oduber Hospital tambe a participa na e evento aki, unda representantenan di diferente departamento tabat’ey pa duna informacion na e studiantenan kico tur nan ta haci. Ora hende pensa riba funcionnan den un Hospital nan ta pensa di biaha riba dokter of nurse pero tin asina hopi mas cu esey y pues kier a ilustra esaki durante e evento aki.
Monique Leerdam, docente di e Departamento di Educacion na Hospital, a duna di conoce cu nan kier conscientisa hendenan cu no ta solamente dokter y nursenan ta traha den hospital, pero tin hopi mas funcion cu ta disponibel na studiantenan cu ta interesa despues di nan MAVO, HAVO of VWO. Nan kier duna e studiantenan informacion di tur profesion cu ta disponibel na Hospital cu nan por studia p’e y eherce den futuro.
Hospital a scoge algun profesion cu nan ta premira cu den algun aña lo bin un scarsedad di personanan eherciendo e profesionnan ey. E profesionnan ey ta verpleeging, operatie kamer y radiologie. Dia 2 di November a presenta na e College Fair Aruba 2018 cu un grupo di nurse, mientras dia 3 di November a bay cu grupo di operatie kamer y grupo di radiologie, kendenan a duna un poco informacion di nan profesion.
Aña pasa hospital a cuminsa cu un vak school constructie y esaki ta encera cu e studiantenan cu ta den nan 3er aña di enfermeria na EPI, por solicita y bira empleado di Hospital. Na momento cu nan bira empleado di Hospital, nan estudio ta cambia di un BOL studie richting pa un BBL richting. E diferencia mas grandi ta cu den e BBL richting nan ta haya di biaha “Hands On Practical Teaching” den Hospital. El a duna di conoce cu hopi studiante gusta esey of ta prefera esey, pasobra di biaha den Hospital por practica kico nan a siña na scol cu pashentnan.