ORANJESTAD – Recientemente a tuma luga e apertura di Global Money Week Aruba na Museum of Industry na San Nicolas. Global Money Week ta un evento cu ta educa e muchanan riba e tereno financiero.
E proyecto aki tawata consisti di 6 stacionnan, manera Learn, Earn, Spend, Save, Share y Innovate. Un proyecto sumamente educativo pa nos muchanan cu por siña con pa maneha placa conscientemente.
Idea (Iniciativa pa Desaroyo pa Empresa Arubano) conhuntamente cu su partnernan Qredits, Santa Rosa y Mundi Health Café a colabora e.o. cu e proyecto den e station di EARN. Nos station tawatin e nomber di “Mundi Health su Cunucu Financiero”. Den e station aki e muchanan por a siña con pa planta un simia di fruta of berdura cu despues e lo crece bira un mata. For di e cosecha ey, nan por traha un producto cu nan por bende riba mercado manera mata herbal pa traha te (Torojil), nan por traha azeta di e mata (oregano oil), jam di fruta (jam di mango of papaya), bende e mata di fruta of berdura mes of bende e cosecha di fruta of berdura.
Tambe den e presentacion nan por a wak diferente cunukeronan di antes den e diferente districtonan na Aruba, comercio di San Nicolas y di Playa di antes y con e waf di Playa tawata antes. Tambe nan a haya un splicacion di e propietario di Mundi Health Café caminda e la splika e muchanan con e ta uza e berdura y frutanan cosecha na Aruba pa traha cuminda y juice natural den su restaurant.
Nos station a purba conscientisa e muchanan con nan por genera placa door di planta den nan mesun cura na cas y por haci di esaki un negoshi. Un total di mas o menos 700 mucha di diferente skolnan a ricibi e bunita presentacion den e station di EARN pa un siman largo.
Departamento di Asuntonan Economico, Comercio y Industria/IDEA ta gradici Banco Central di Aruba pa e gran oportunidad aki pa por a participa den un bunita proyecto educativo pa nos muchanan. Tambe nos ta felicita tur e otro socionan (di e otro stationnan) cu a haci e proyecto aki bira un exito. Nos ta gradici nos partnernan Qredits, Santa Rosa, Mundi Health Café y Community Museum San Nicolas pa haci e station di EARN uno espectacular y tambe nos colega Sr. Xavier Boekhoudt.