Encuesta Forsa Laboral 2018 ta drentando su ultimo siman. For di 19 di Oktober te cu 15 di November 2018 Departamento di Labor y Investigacion (DAO) ta realisando su di ocho Encuesta di Forsa Laboral (EFL 2018). E EFL 2018 ta tuma lugar den cooperacion cu e Oficina Central di Estadistica (CBS) como tambe di Banco Central di Aruba. E EFL 2018 tin como meta forma un imagen actual y completo di e mercado laboral di Aruba. Un meta importante di e EFL 2018 ta e midimento di e cifra di desempleo pa Aruba. Pa medio di e informacion recohi tambe lo determina otro caracteristicanan y indicadornan importante di e mercado laboral cu ta necesario pa un analisis mas profundo di e mercado laboral, manera e.o. e grado di participacion y e nivel di educacion di e trahadornan. E datosnan y e tendencianan señala lo sirbi esnan cu ta stipula maneho, gobernantenan, investigadornan y empresarionan pa nan mehora y rafina nan maneho pa cu e mercado laboral.
Con bo persona por yuda?
Mas cu 1000 adresnan cu a cai den e muestra (sample) di 2000 adresnan reparti riba henter Aruba a wordo bishita caba. DAO ta gradici tur esnan cu a duna nan colaboracion na nos encuestadornan. Pa nos completa e 2000 adresnan, nos encuestadornan ta bishitando e adresnan cu a cai den e sample e ultimo simannan aki. Y pa e motibo aki, DAO ta pidiendo cooperacion di e habitantenan di e adresnan pa participa na e encuesta forsa laboral. Den e encuesta aki solamente esnan di 15 aña bai ariba lo ser entrevista y pa esaki no ta importa si e persona ta traha of no. Pa medio di e cuestionario bo lo contesta algun pregunta riba bo situacion actual riba e mercado laboral.
E encuestadornan lo bishita e adresnan selecta di dialuna pa diadomingo entre 08.00 a.m. y 08.00 p.m. E encuestadornan lo identifica nan mes cu un badge special di DAO y nan lo bisti un t-shirt cora cu nos logo. Den caso cu no tin ningun hende na cas, e encuestador lo laga un carta atras cu su number di telefon. Nos ta pidi bo pa por fabor tuma contacto mas liher cu ta posibel cu e encuestador pa traha un cita cune. Tambe bo por yama DAO (tel: 5237720) pa asina traha un cita.
Privacidad
Tur informacion lo ser procesa anonimamente y lo ser publica solamente den forma agrega. Bo privacidad ta ser garantisa pa Departamento di Labor y Investigacion.
Bo informacion lo contribui na mehora e bista riba desaroyonan den e mercado laboral di Aruba. Pesey bo participacion na e EFL 2018 ta esencial.
Departamento di Labor y Investigacion ta gradici tur persona cu a participa caba na e encuesta y di antemano danki na tur cu ainda falta pa participa. Pa mas informacion riba e Encuesta di Forsa Laboral 2018, bo por tuma contacto cu number di telefon 5237720 y puntra pa un di e trahadornan di e Oficina di Investigacion di Mercado Laboral (Bureau Arbeidsmarktonderzoek).