Home Local Aruba un biaha mas cu oportunidad pa participa na Conferencia Anual cu...

Aruba un biaha mas cu oportunidad pa participa na Conferencia Anual cu FCCA

 

ORANJESTAD,Aruba

Aruba un biaha mas tabata bon representa na e di 25 Conferencia y Trade Show Anual di Florida Caribbean Cruise Association (FCCA), unda lidernan di mundo di turismo y sector di crucero ta topa pa mira y scucha di e ultimo desaroyonan den mundo di crucero.

Ehecutivo di Aruba Ports Authority a forma parti di e conferencia aki. E reunionnan a tuma luga for di 5 pa 9 di november na Puerto Rico den cual a participa Ministernan di Turismo, ehecutivonan hotelero y agencianan turistico.

E  tabata 4 dia di encuentronan basta informativo y fructifero unda a sigui sondea oportunidadnan nobo pa turismo crucero pa Aruba. E tabata un momento cu Aruba semper ta probecha mirando e cantidad di empresanan presente na mesun momento na un punto central, unda cu por discuti posibel acuerdonan, of extende acuerdonan existente. “Esaki sigur ta un bon chens unda Aruba no solamente por mustra loke cu e tin di ofrece, via e boothnan turistico, pero tambe ta haya e chens di hiba combersacion cu diferente partner of futuro partner. Y tur ta na un solo sitio cu ta haci e tipo di encuentro aki uno hopi eficiente,” Humphrey Tromp, director interino di APA a duna di conoce.

Tabatin tin oportunidad pa participa den e cuatro (4)  “One-on-One Meeting” cu a wordo organisa cu e companianan MSC Cruises; Norwegian Cruise Line Holding; Carnival Corp / Carnival Cruise Line / Holland American Group / AIDA Cruises; Disney Cruise Line y Royal Caribbean Cruises. Tabatin mas cu 100 representante di e companianan crucero, kende ta esnan responsabel pa operacion di e barconan cu ta bishita entre otro Aruba.  

No solamente den e sesionnan priva, pero den e diferente encuentronan, a haya informacion di e ultimo desaroyonan den mundo crucero, e barconan di mas nobo, kico ta e exigencianan pa ricibi e barconan grandi cu ta wordo construi awendia y hopi mas.

E conferencia di FCCA ta wordo organisa pa crea un miho forma di comunicacion directo entre e industria crucero y paisnan manera Aruba cu ta trahando pa sigui atrae mas turista di e sector aki y ta haya sa tambe kico mester wordo mehora na infrastructura pa atrae e cruceronan aki.

Den reunionnan a corto plaso APA lo sinta cu partner y stakeholdernan na mesa pa mira con y kico di loke a experencia den e conferencia di FCCA ta bay sigui traha riba dje pa haci nos isla mas atractivo.