Oranjestad- Pa varios aña caba e miembro y boluntarionan di Rotaract Club of Aruba ta organisa diferente sessionnan durante aña escolar pa e examenkandidaten. Ta custumber cu e sessionnan aki ta wordo organisa hunto cu Filomena College Mavo pero e aña aki a dicidi pa expande e proyecto pa otro scolnan tambe. Rotaract Club of Aruba ta contento pa tin Abraham de Veer School como un di e scolnan participando den e ‘Graduation Project,’ un proyecto specialmente dirigi na motiva e studiantenan y duna nan tips valioso cu nan por haci uso di dje den examenjaar como den transcurso di nan estudio.
Net prome cu e prome tentamennan a cuminsa, Rotaract Club of Aruba a bishita Abraham de Veer hunto cu empresario, Jacky Boekhouwer, kenda tambe tin experencia di a studia na un Mavo y awe tin su mesun negoshi den e industria turistico. Jacky a comparti cu e muchanan su retonan cu e la experencia durante su añanan na Mavo como tambe con e la yega unda e ta awe.
Alabes, e District Rotaract Representative pa districto 7030 di Rotary International, Delon Earle tambe a join e team di Rotaract na e bishita aki. Rotaract Club of Aruba ta forma parti di e famia di Rotary cu ta un organisacion international. Clubnan rond di mundo ta wordo parti den diferente disctricto, unda Aruba ta forma parti di districto 7030 desde januari 2017. Cada aña ta apunta un miembro di Rotaract den e districto cu lo mester representa y cabesa tur e clubnan den districto serca Rotary. E aña aki e persona aki ta Delon Earle cu ta un hoben di Guyana. Delon a keda impresiona cu e trabou cu Rotaract ta haciendo pa e comunidad di Aruba y ta contento cu e lo por a participa den un di e proyectonan cu Rotaract tin.
Hunto, a haci un paar di ehercicio cu e muchanan pa asina preparanan pa e aña cu ta bin. Asina a laga e muchanan yena un formulario cu e cifranan cu ta bai ‘aim’ pe e aña aki y un otro unda nan mester elabora nan motibo cu nan tin pa slaag.
Un danki sigur lo mester bai na e miembro y boluntarionan cu ta dedica nan tempo na e proyecto aki, como tambe e maestronan di Abraham de Veer cu ta yuda Rotaract. No por keda di gradici Jacky Boekhouwer, Delon Earle y Stephanie Boekhouwer pa a tuma e tempo pa cu e proyecto aki, y asina yuda motiva e studiantenan di Abraham de Veer School.