ORANJESTAD – Dialuna den conferencia di prensa Minister di Salubridad Publico Sr. Dangui Oduber a trece dilanti cu lo bay atende cu e problematica di persona cu problema mental y adiccion. Haciendo esaki un prioridad nos ta sigi cumpli cu e programa di gobernacion. Minister a splica cu na comienso di e aña aki a intitui un “stuurgroep”cu e tarea pa haci un inventarisacion kiko ta e situacion y tambe trece sugerencianan dilanti con pa atende cu tur e retonan cu tin. Na e momentonan aki e “stuurgroep” a finalisa su tareanan y a presenta diferente sugerencianan cu e Ministerio di Salubridad Publico lo bay ehecuta.
Actualmente tin un fragmentacion den e manera cu ta atende e problematica ki, e obhetivo di e Ministerio ta pa centralisa y integra. Tin esnan cu tin problema mental y tin esanan cu tin problema di adiccion pero bo ta haya esnan cu tin ambos problema. Tur e personanan aki ta problema pa nan mes, problema pa nan famia y problema pa sociedad. E situacion aki tin atencion debido di gobierno y ta pone esaki como prioridad, no solamente bisando esaki pero tambe poniendo accion tras di nos palabra segun e Minister. Gobierno lo pone placa tambe necesario pa asina duna cuido na e personanan aki. Na e momentonan aki Gobierno lo bay introduci un “Linea Central di contaco”.
Linea Central di contacto (central meldpunt)
E idea di e “central meldpunt” ta pa tin un number central caminda cu famia, amigonan, conocirnan por yama y informa Social Psychiatrische Dienst (SPD). SPD ta un unit cu ta cay bou di DVG cu a wordo lubida durante e ultimo 8 añanan aki. Un departamento cu di 21 trahado a wordo corta te cu 5 trahado, asina e Mandatario a declara den e conferencia di prensa. SPD ta bay percura pa bin cu “fact teams”.
Fact Teams
“Fact teams” ta un ekipo cu ta bay sali riba caya y brinda e cuido y servicio na tur e personanan cu ta sufri di problema mental y adiccion. Por ehempel ora cu SPD haya yamada, e “fact team” aki lo sali bay na e direction y haci un opname y mira e situation. Si ta un situacion di tal gravedad e persona lo mester wordo interna na Respaldo. Si ta trata di un adicto e tin cu sigi un tratamento pa adiccion. Si e persona ta sufri di ambos e “fact teams” lo scohe e problema mas serio na e momento eynan pa atende cune. Esaki ta loke e trabou di e “fact team” lo ta segun Minister Dangui Oduber. Gobierno lo bay reenforsa e departamento di SPD bek pa asina nan por fuciona manera mester ta. A percura den Social Crisis Plan caba pa tin fondo disponibel pa busca mas psychiater, psycoloog y miembro di e “fact team” pa haci e “central meldpunt aki posibel. Y asina aki Minister Dangui Oduber ta sigi cumpli cu e plan di gobernacion.