ORANJESTAD – Durante dos siman largo un grupo di studiante di Hogeschool Rotterdam hunto cu nan professor di SUS Ateliers a haci un pressure cooker workshop den e area di Eagle. Den e periodo cortico aki nan a keda den e area, a ricibi lecturanan for di diferente expertonan y a haci un investigacion profundo tocante e historia di e area di Eagle.
Dialuna 5 di november nan a tene un presentacion na House of Mosaic pa Minister di Finansas, Economia y Cultura, Xiomara Ruiz Maduro y invitadonan cu a contribui na e proyecto.
E presentacion tabata den forma di un carrousel caminda a splica cinco diferente aspecto di e historia y desaroyo di e area.
E prome aspecto tabata e compilacion di e histora perdi di Eagle. Esaki e studiantenan a traha den forma di un buki cu a keda entrega na Minister di Cultura y e studiantenan tin plan pa por publica esaki tambe den futuro.
E di dos aspecto ta e desaroyo di e area di Waf na Oranjestad. Akinan e studiantenan ta mira un bon oportunidad pa reconecta e area di Eagle, Madiki y Rancho un biaha mas cu e awa. Asina lo inclui y duna balor na e areanan aki tambe.
E di tres aspecto tabata pa rebiba e historia di Eagle. E idea ta pa den forma di un ruta ilumina tur e lugarnan cu a hunga un rol importante den e historia di e refineria. Algun ehempel ta ‘Taratata wharf’, e oficina principal y e ‘steiger’ bieu,
E ultimo dos aspectonan Tabata e e area di e casnan cu a pertenece antes na e refineria y activa un transicion un biaha mas manera den pasado a wak esaki pasa di pesca pa industria di petrolio y despues pa turismo. Pero e biaha aki usando metodonan alternativo pa haci aruba menos dependiente.
Den e dos simanan aki e studiantenan a crea plannan cu lo por tene cuenta cune pa e desaroyo di Eagle cu ta combina e historia, desaroyo economico y e reconeccion di e area cu e awa manera antes.
Stichting Monumentenfonds kier gradeci e sponsorsnan cu a yuda haci e proyecto aki posibel: Jaap Beaujon, House of Mosaic, MVC Eagle, Superfood.
Pa mas informacion: www.susateliers.nl F: Stichting Monumentenfonds Aruba