UPP cu hopi preocupacion a bin ta tumando nota di henter e asunto di portofoon y detencion di miembronan di prensa. Naturalmente cu propiedad di pueblo no por wordo uza pa otro finnan cu ta pa uzo dor di ambtenaar (polis) pa cumpli cu nan trabou na bienestar general di nos comunidad. Pues na momento cu ta papia di horta ekipo di gobierno, sea dor di un empleado publico of dor di un tercera, of cu ta trata di cumpra of regala esaki for di un acto di ladronicia, cu ta comberti su mes den heling, ta necesario pa autoridadnan tuma e pasonan necesario pa asina coregi e situacion y si esnan cu tin culpa den esaki, nan mester wordo atendi cu ne di acuerdo cu ley.
Pero e melodrama, e discusionnan bay y bin di ambos banda cu ta tumando lugar, di un banda ta pa kizas tene fanaticonan trankil , pero na mes momento ta creando momentum pa partido di oposicion den Parlamento tuma accionnan politico y dramatisa, loke e.o. a resultado den e payasada di bay libera hende y bay grita dilanti warda di polis. Anto esaki pasobra segun nan democracia ta na peliger y ta sali pa derecho di dos individuo. Mientras cu ta e mesun ex-Prome Minister aki y ex-Minister di Husticia, a manda Riot riba e pueblo cu a manifesta riba 27 di augustus 2015, minando nan derecho democratico di protesta.
Mientras cu UPP ta kere cu e proceso di investigacion mester encamina su caminda legal y pa asina determina kico realmente te caso. Pero loke cu na nos aparecer ta wordo crea na e momentonan aki, ta un smokescreen pa varios cosnan cu ta pasando aki na Aruba. Tanto den seno di gobernacion, particularmente loke ta tumando lugar pa loke ta nombracionnan, asunto di dump, asunto den nos salubridad publico cu ta mustra hopi bruha, maneho di admission cu keto bay tin cosnan cu ta sosode cu no ta na bienestar di e Arubiano, e cambionan fiscal cu ta na caminda cu lo haci dolor na e pueblo, e maneho laboral anti-Arubiano y sin conta loke ta pasando cu CITGO, cu parce di lo ta alfinal un proyecto fracasa. Pa loke ta partido di oposicion AVP esaki ta crea un discordia den pueblo, promoviendo nan mes como e defesornan di pueblo guia pa e persona cu a nenga di bay Parlamento pa duna cuenta y representa e pueblo. Pero na mes momento nan ta purba na desvia e atencion riba e debaclenan cu nan a laga Aruba aden y e asunto nan ex-minister cu proximamente lo bira central den atencion di pueblo.
E pregunta di UPP ta si cu realmente acontesimento aki mester haya asina tanto atencion. Realidad di mundo moderno ta cu tin otro medionan tambe cu por intercepta comunicacion di polis. Pero inside tambe por tin leaknan di informacion. Realidad tambe ta cu un ex minister ta hiba ekiponan di gobierno cas y despues, kier cumpra esakinan, pero a haya chens di entreganan, sin cu nada no ta wordo haci. Tabata tin asina tanto ekipo cu a disparce y cu a duna tempo pa trece nan bek pa gobierno, sin sa kico tur di berdad a bin bek. Awor parce cu nos tur ta hogando den un glas di awa y Dios sa cu ki fin!
UPP kier mustra bon cla, cu nos no ta goza di e pena y sufrimento cu esnan envolvi ta pasa aden. Esaki tambe nos a bisa esaki tempo cu e ex-minister di AVP a keda deteni den asunto di ontheffing. Si nos a pidi pa den tur sensatez instancianan hudicial haci nan trabou y percura pa tin un proceso husto den esaki. UPP ta spera tambe cu e motibo di persecucion ta uno meramente penal y cu lo no tin otro motibonan su tras. Ya pa añanan caba nos ta pasando den un situacion na unda cu derecho y libertad di expresion, den cierto sentido ta wordo mina, pa meramente e fenomeno di prensa comprometi. Y UPP ta spera cu esaki no bira peor.
Nos ta pidi nos pueblo pa keda sensato y no laga emocion bolbe domina nos y pa asina haya nos den dos campo cu ta bringando otro, mientras cu rond di henter e asunto aki un smokescreen ta wordo crea, pa kita nos atencion, di problemanan real cu nos pais ta enfrentando tur dia.
Booshi Wever
Lider UPP
Brazil 163
Aruba, 7 november 2018