Durante ultimo lunanan tabata tin reunionnan semanal relaciona cu ehecucion di e Sociaal Crisisplan (SCP). Directora di Departamento di Asuntonan Social, sra. drs. Glenda Hernandez, ta encabesa e proceso di coordinacion y ehecucion di e proyecto SCP. E proyecto SCP a ser compila a base di rapportnan entrega pa mas o menos 20 departamentonan gubernamental y diferente ministerionan, manera Ministerio di Asuntonan Social, Ministerio di Husticia, Ministerio di Salud Publico, Ministerio di Educacion y 12 fundacion/organisacionnan trahando riba tereno social. Cada un a entrega nan rapport cu ta contene e aspectonan problematico social, posibel solucionnan y e aspecto financiero di cada instancia. Tur esaki a ser incorpora den un solo proyecto cu ta e Sociaal Crisisplan/SCP. Tin dos aspecto hopi importante cu e crisisplan ta pone enfasis riba nan, esta e parti preventivo y esun curativo di e retonan social.
Como parti di e vision y maneho di Minister di Labor y Asuntonan Social, sr. Glenbert Croes, a pone prioridad riba diferente aspecto social cu nos comunidad ta enfrentando. Despues di un inventarisacion extenso di tur e retonan – hunto cu 40 ‘stakeholders’- a yega na un Plan di Accion pa enfrenta diferente aspecto manera menciona den e SCP. E Plan di Accion ta pone enfasis riba maneho a termino corto y a largo plaso. Durante varios luna mester a reuni cu e.o. Ministerio di Finanzas, Ministerio di Husticia, Ministerio di Salud Publico, Departamento di Recurso Humano, Departamento Huridico, pa atende e parti di legislacion di e fondo di e Crisis Plan Social (aspectonan di maneho, financiero, control, personal etc).
Despues a sigui cu e parti organisatorio y awor ta cla pa cuminsa ehecuta aspectonan di e Crisis Plan Social. Na augustus ultimo Parlamento a aproba Legislacion di e ‘begrotingsfonds’ pa asina garantisa implementacion di e Crisis Plan Social. Despues di esaki a sigui reunionnan semanal y mensual entre e 40 instancianan pa conhuntamente prepara e parti organisatorio, esta cada aspecto cu lo mester tene cuenta cu ne pa ehecuta e plan di un manera structura. Tur parlamentarionan di comision fiho di Asuntonan Social tambe ta wordo invita pa ta presente den e reunionnan mensual di SCP.
Pronto lo cuminsa cu e aspecto di ehecucion. E departamentonan gubernamental y e fundacionnan social ta trahando duro pa cuminsa structuralmente riba e Plan di Accion cu cada un a delinea pa asina adresa e retonan specifico riba tereno social manera compila den e Sociaal Crisisplan. Departamento di Asuntonan Social/DAS lo tene pueblo informa di tur desaroyo relaciona cu e Sociaal Crisisplan. Sra. Drs. Glenda Hernandez ta sigura cu tur partnernan den e crisis plan social ta trahando structuralmente hunto pa cuminsa cu e ehecucion specifico di e crisis plan social. Ta trahando riba tres nivel; esta esun di ley, maneho y ehecucion.
• Ta bezig pa escohe un sistema di registracion di famianan vulnerabel aki na Aruba pa asina por actua mas trempan. Den esaki ta bastante leu.
• Lo bin hunto cu e diferente scolnan aki na Aruba pa traha na mehora e situacion social na scol y na cas
• Ta trahando pa baha e listanan di espera di Voogdijraad, Bureau Sostenemi y Departamento di Asuntonan Social
• Ta trahando pa bin cu un campaña di comunicacion tocante e crisis social
• Den cada bario Stichting Wit Gele Kruis lo bay duna sosten na e famia vulnerabel ora un baby nace
• Ta bezig ta ampliando posibilidad pa atende y guia mas mucha y hoben na diferente centro di guia
• Lo cuminsa un campaña di con pa cria bo yiu na luna di november 2018
• Ta atendiendo mas hoben cu problema psikiatrico y cu problema den conducta
• Lo habri na januari 2019 na Centro di Cuido na San Nicolas un luga pa atende hoben y muchanan cu necesidadnan special
• Lo drecha e sistema di registra hoben cu ta keda sin presenta na scol
• Lo percura pa haya mas trahado social den e barionan aki na Aruba
• Lo traha mas hunto riba tereno social, hudicial, enseñansa y cu bienestar publico pa por atende e retonan social na un miho forma
• Lo sostene mayornan miho den nan tarea con pa cria yiu door di ofrece diferente tayer y door di habri un centro pa famia destina pa guia mayornan
Esaki nan ta algun di e proyectonan cu ta ofreciendo y lo amplia esaki tanten cu e Crisis Plan Social ta den ehecucion.
Pa mas informacion of pregunta tocante e desaroyo di e Sociaal Crisisplan, por tuma contacto na telefon 528-1100 ext. 189 of like nos pagina di facebook ‘Sociaal Crisisplan’ y keda informa di tur desaroyo.